ہیٹ ویو برقرار، ملک کے دیگر حصوں میں شدید گرمی کی لہر

ملک کے بیشتر علاقے آج بھی گرمی کی لپیٹ میں رہیں گے جبکہ آئندہ 24 گھنٹوں میں بارش کا کوئی امکان نہیں ہے۔

رواں ہفتے ملک کے بیشتر علاقے گرم رہیں گے۔ بڑھتی ہوئی گرمی کی لہر نے ملک کے بیشتر علاقوں کو اپنی لپیٹ میں لے رکھا ہے، دن کے وقت درجہ حرارت میں نمایاں اضافہ ریکارڈ کیا جا رہا ہے۔

محکمہ موسمیات کے مطابق سندھ اور پنجاب کے صوبوں میں 27 مئی تک درجہ حرارت 6 سے 8 ڈگری سینٹی گریڈ زیادہ ہونے کا امکان ہے۔ اسلام آباد اور گردونواح میں موسم شدید گرم رہے گا۔

خیبر پختونخوا کے بیشتر اضلاع میں موسم گرم اور خشک رہنے کا امکان ہے جبکہ میدانی اضلاع میں موسم شدید گرم رہے گا، درجہ حرارت معمول سے 4 سے 6 ڈگری سینٹی گریڈ زیادہ رہنے کی توقع ہے۔

محکمہ موسمیات کے مطابق لاور میں موجودہ درجہ حرارت 33 ڈگری، زیادہ سے زیادہ 46 ڈگری سینٹی گریڈ تک جانے کا امکان ہے،ہوامیں نمی کا تناسب 48 فیصد ہے،ہوا 18 کلو میٹر فی گھنٹہ کی رفتار سے چل رہی ہے۔

ائیر کوالٹی انڈیکس کی مجموعی شرح 177  ریکارڈ کی گئی ،جس سے لاہور ملک بھر میں فضائی آلودگی کے اعتبار سے پہلا نمبر برقرار ہے۔

گزشتہ روز ملک میں سب سے زیادہ درہ حرارت موہنجو داڑو، جیکب آباد اور دادو میں 49 ڈگری سینٹی ریکارڈ کیا گیا،سبی، لاڑکانہ، نواب شاہ، خیرپور، سکھر، پڈعیدن اور نور پور تھل میں 48 جبکہ مٹھی، چھور، بہاولنگر، بھکر، کوٹ ادو اور رحیم یار خان  میں 47 ڈگری سینٹی گریڈ ریکارڈ کیا گیا۔

ملتان، ساہیوال 45، لاہور، فیصل آباد 44، پشاور 42، اسلام آباد، مظفر آباد 41، گلگت 38، کراچی 37 اور کوئٹہ میں زیادہ سے زیادہ درجہ حرارت 34 ڈگری سینٹی رہا۔