بھارت: گیمنگ زون میں آتشزدگی ،9بچوں سمیت 27 افراد ہلاک

بھارت کی ریاست گجرات کے شہر راجکوٹ میں گیمنگ زون میں آگ لگنے سے 9بچوں سمیت 27 افراد ہلاک ہوگئے۔کئی افراد ملبے تلے دب گئے۔ گیم زون سے 15 سے 20 بچوں کو بچایا گیا ہے۔

بھارتی میڈیا کے مطابق گجرات پولیس نے ٹی آر پی گیم زون کےمالک سمیت 3 افراد کو گرفتار کرلیا ہے، آگ گیمنگ زون کے اندر بنائی گئی ایک عارضی حصے میں لگی۔

رپورٹ کے مطابق متعدد افراد زخمی بھی ہیں اور ہلاکتوں میں اضافےکا بھی خدشہ ہے۔

گجرات کے وزیراعلیٰ بھوپیندر بھائی پٹیل نے متعلقہ حکام کو ہدایت کی کے زخمیوں کے فوری علاج کے لیے اقدامات کئے جائیں جب کہ انہوں نے ہلاک شدگان کو فی کس 4 لاکھ روپے دینے کا بھی اعلان کیا۔

رپورٹ کے مطابق حکام نے واقعے کی تحقیقات کے لیے سینئر آئی پی ایس آفیسر سباش تریویدی کی سربراہی میں تحقیقاتی ٹیم تشکیل دے دی۔

افسوسناک واقعے پر بھارتی وزیر اعظم نریندر مودی نے کہا کہ راجکوٹ میں آتشزدگی کے حادثے پر انتہائی غمزدہ ہوں۔میرے دعائیں ان لوگوں کے ساتھ ہیں جنہوں نے اپنے پیاروں کو کھو دیا ہے۔انتظامیہ متاثرہ افراد کو ہر ممکن مدد فراہم کرنے کے لیے کام کر رہی ہیں۔