بھارتی کرکٹ ٹیم کے ہیڈ کوچ کے لیے مضحکہ خیز درخواستیں موصول

بی سی سی آئی کو بھارتی کرکٹ ٹیم کے ہیڈ کوچ کی اپلائی کے لیے مضحکہ خیز جعلی درخواستیں موصول ہونے کا انکشاف ہوا ہے۔ 

بھارتی میڈیا کی رپورٹس کے مطابق بھارتی کرکٹ بورڈ نے 13 مئی 2024 کو نئے ہیڈ کوچ کی اپلائی کے لیے گوگل فارم جاری کیا۔ گوگل فارم جاری کرنے کا فیصلہ اس کے آسان طریقہ کار کو مدنظر رکھتے ہوئے کیا گیا۔ 

میڈیا ذرائع کے مطابق بھارتی کرکٹ بورڈ کو ڈیڈ لائن سے قبل ہیڈ کوچ کے لیے پانچ  ہزار سے زائد درخواستیں موصول ہوئیں۔  
27 مئی 2024 تک موصول ہونے والی تین ہزار سے زائد درخواستوں میں ملکی اور بین الاقوامی سطح کی اہمیت کی حامل شخصیات کے نام پائے گئے۔ 

ذرائع کے مطابق صارفین نے کرکٹ کے بڑے ناموں کے علاوہ سیاست دانوں کے ناموں سے بھی جعلی درخواستیں جمع کروا دیں۔ شامل ہونے والے ناموں میں مھیندر سنگھ دھونی، ہربجن سنگھ اور موجودہ وزیرا عظم نریندرا مودی سمیت کئی دوسری مشہور شخصیات کا نام بھی شامل ہے۔  

ذرائع کے مطابق بی سی سی آئی کے لیے سب سے بڑا چیلنج اس بات کا تعین کرنا ہے کہ آیا کہ موصول ہوئی درخواست اصل ہے یا پھر جعلی ۔ 
یاد رہے کہ ایسا بھارتی کرکٹ بورڈ کے ساتھ پہلے بھی ہو چکا ہے۔ 2022 میں ہیڈ کوچ کے لیے مانگی گئی درخواستوں میں بھی بھارتی کرکٹ بورڈ کو ایسی ہی صورت حال کا سامنا کرنا پڑا تھا۔ 

ذرائع کے مطابق بھارتی کرکٹ ٹیم کے موجودہ کوچ راہول ڈریوڈ کا بھارتی کرکٹ بورڈ کے ساتھ کانٹریکٹ ٹی ٹوینٹی ورلڈکپ کے بعد ختم ہو رہا ہے۔ نئے منتخب ہونے والے ہیڈ کوچ ٹی ٹوینٹی ورلڈ کپ کے بعد جولائی میں بھارت کی سری لنکا کے خلاف ہونے والی سیریز سے اپنی خدمات کا آغاز کریں گے۔