اسرائیل نے مصر کے ساتھ غزہ کی پوری سرحد پر قبضہ کر لیا

اسرائیلی فوج نے دعویٰ کیا کہ غزہ کی پٹی اور مصر کے درمیان فلاڈیلفیا کے محور کا مکمل آپریشنل کنٹرول حاصل کر لیا ہے۔

اسرائیلی فوج نے کہا کہ ہم نے فلاڈیلفیا کے پورے محور کا کنٹرول سنبھال لیا، حماس نے فلاڈیلفیا محور میں بنیادی ڈھانچہ قائم کیا ہے۔ رفح گزرگاہ کے علاقے میں ایک 1500 میٹر لمبی سرنگ کو تباہ کر دیا گیا ہے۔

دوسری جانب غیر ملکی خبر رساں ادارے کے مطابق اسرائیلی فوج نے غزہ کی پٹی اور مصر کے درمیان سرحد کا مکمل کنٹرول حاصل کر لیا اور اسرائیلی فورسز نے علاقے میں کھلنے والی 82 سرنگوں کا کنٹرول بھی ہاتھ میں لے لیا ہے، ان سرنگوں کو بعد میں تباہ کرنے کے لیے ان کا جائزہ لیا جا رہا ہے۔

علاوہ ازیں اسرائیلی قومی سلامتی کے مشیر زاچی ہنیگبی نے گزشتہ روز کہا تھا کہ اسرائیلی فوج اب غزہ کی پٹی اور مصر کی سرحد کے ساتھ فلاڈیلفیا کے محور کے 75 فیصد حصے پر کنٹرول رکھتی ہے۔ مصر اور اسرائیل کے درمیان امن معاہدے کے تحت فلاڈیلفیا محور کوبفر زون سمجھا جاتا ہے لیکن مصر کی سرحد پر واقع شہر رفح میں اسرائیلی فوجی آپریشن کے دو ہفتے بعد صہیونی فوج نے اس حصے کو بھی کنٹرول میں لے لیا ہے۔ اسرائیلی کنٹرول کے بعد اس بفرزون علاقے کی حیثیت اور امن معاہدے کے حوالے سے سوالات پیدا ہوگئے ہیں۔

گزشتہ چند دنوں میں اسرائیلی افواج نے رفح کے وسط میں پیش قدمی کی اور فلاڈیلفیا کے آدھے سے زیادہ محور پر کنٹرول حاصل کیا تھا۔ اس علاقے جکوصلاح الدین روڈ بھی کہا جاتا ہے۔

بین الاقوامی عدالت انصاف کی جانب سے شہر پر حملے بند کرنے کے حکم کے باوجود اسرائیل نے جنوبی غزہ میں رفح پر مہلک حملے جاری رکھے، جہاں غزہ کے 2.3 ملین افراد میں سے نصف پہلے پناہ لیے ہوئے تھے۔