کراچی سمیت کوئٹہ اور کوہاٹ  کے ماحولیاتی نمونوں میں پولیو وائرس کی تصدیق

 کراچی کے 3 اضلاع سمیت کوئٹہ اور کوہاٹ  کے ماحولیاتی نمونوں میں پولیو وائرس کی تصدیق ہوئی ہے۔

 ترجمان ایمرجنسی آپریشن سینٹر (ای او سی) کے مطابق رواں سال مجموعی طور پر 39 اضلاع کے 153 سیمپلز پولیو پازیٹو  نکلے ہیں،5 اضلاع سے پولیو ٹیسٹ کیلئے سیمپلنگ 9 تا 15 مئی ہوئی تھی۔

ذرائع وزارتِ صحت  کے مطابق کراچی ایسٹ راشد منہاس روڈ، مچھر کالونی کی سیوریج پولیو پازیٹو ، سنٹرل حاجی مرید گوٹھ کی سیوریج  اور کراچی ایسٹ، سنٹرل کی سیوریج میں بھی  پولیو وائرس پایا گیا ہے۔

کوئٹہ کے علاقہ طاؤس آباد کی سیوریج پولیو پازیٹو ہے،کوئٹہ کی سیوریج کے پولیو وائرس کا جینیاتی تعلق چمن سے ہے، کوہاٹ کے علاقہ فقیر آباد کی سیوریج پولیو وائرس سے متاثرہ ہے جبکہ کوہاٹ کی سیوریج کے پولیو وائرس کا جینیاتی تعلق پشاور سے ہے۔

سربراہ پاکستان پولیو پروگرام ڈاکٹر شہزاد ملک نے کہا کہ جون سے ملک کے 70 مخصوص اضلاع میں پولیو مہم شروع کی جارہی ہے۔ پولیو مہم میں ایک کروڑ 70 لاکھ سے زائد بچوں کو پولیو سے بچاؤ کے قطرے پلائے جائیں گے۔

انہوں نے کہا کہ متاثرہ علاقوں میں خصوصی توجہ دی جارہی ہے تاکہ ملک کے مستقبل کو محفوظ بنایا جاسکے۔ والدین سے اپیل ہے کہ اپنے 5 سال سے کم عمر بچوں کو پولیو ویکسین لازمی پلوائیں۔