پولیس کرائم کنٹرول کرے، کسی جگہ بھی نو گوایریا برداشت نہیں، مریم نواز

وزیراعلیٰ پنجاب مریم نواز نے کہا کہ پولیس کرائم کو کنٹرول کرے، پنجاب میں کوئی بھی نو گو ایریا برداشت نہیں کیا جائے گا۔

وزیراعلیٰ پنجاب مریم نواز کی زیر صدارت خصوصی اجلاس ہوا۔اجلاس میں صوبے میں امن و امان کے حوالے سے صورتحال کا جائزہ لیا گیا۔آئی جی پنجاب ڈاکٹر عثمان انور نے امن و امان اور پولیس کی کارکردگی کے حوالے سے بریفنگ دی۔

وزیراعلیٰ پنجاب مریم نواز نے اجلاس سے خطاب کرتے ہوئے کہا کہ 13 کروڑ عوام کو جوابدہ ہوں ، پولیس حکام کرائم کنٹرول کرے۔حقائق سے آنکھیں بند نہیں کی جا سکتی، پنجاب میں کوئی بھی نو گو ایریا برداشت نہیں کیا جائے گا۔

انہوں نے کہا کہ صوبے میں کرائم ریٹ کو ہر صورت نیچے لانا ہو گا، جرائم زیادہ ہوں تو عوام حکومت کی ریفارمز اور ڈویلپمنٹ بھول جاتی ہے۔

مریم نواز نے کہا کہ پولیس کے ساتھ ہوں، فورس کے پیچھے کھڑی ہوں، یونیفارم پہن کر اظہار یکجہتی کیا۔ انہوں نے کہا کہ پولیس کو پورے وسائل مہیا کررہے ہیں تاکہ کارکردگی میں کمی نہ آئے۔

وزیراعلیٰ پنجاب کا کہنا تھاکہ پولیس قربانی بھی دے رہی ہے مگر کالی بھیڑیں بھی موجود ہیں، کرپشن کے خاتمے کیلئے پولیس کی کارکردگی کے تجزیے اور جانچ کا نظام لا رہے ہیں۔

انہوں نے مزید کہا کہ بین الاالصوبائی سمگلنگ روکنے کے لئے 14 خصوصی چیک پوسٹ بنائی جا رہی ہیں، گاڑیاں ، آلات، اسلحہ، ٹریننگ اور پولیس کی ہر ڈیمانڈ پوری کررہے ہیں۔چیک پوسٹ پر کھڑے ہر پولیس اہلکار کی حفاظت یقینی بنانا ذمہ داری ہے.

اجلاس سے خطاب کرتے ہوئے مریم نواز کا کہنا تھا کہ  ڈی جی خان ماڈل پر صوبے بھر میں بجلی چوری کے سد باب کے لئے موثر کارروائی کی جائے۔بجلی چوری ختم ہو گی تو لوڈشیڈنگ بھی صفر ہو جائے گی۔