بانی پی ٹی آئی نے حمود الرحمان کمیشن رپورٹ پڑھنے کا مشورہ دیا تو اس میں غداری کیا ہے، عارف علوی

سابق صدر مملکت عارف علوی نے کہا ہے کہ اتنا ظلم تو پرویزمشرف کے دور میں نہیں ہواجتنا اب ہو رہا ہے، اس طرح غیر ملکی سرمایہ کاری ملک میں نہیں آئے گی۔

میڈیا سے گفتگو کرتے ہوئے عارف علوی نے کہا کہ بانی پی ٹی آئی نے حمود الرحمان کمیشن رپورٹ پڑھنے کا مشورہ دیا تو اس میں غداری کیا ہے۔ صرف اتنا ہو رہا ہے کہ منہ بند کرا دو، اسٹیک ہولڈرز سے مذاکرات کے بغیر مسائل حل نہیں ہو سکتے۔عمران خان نے صرف حمود الرحمان کمیشن کی رپورٹ پڑھنے کا کہا، کچھ غلط نہیں کیا۔

سابق صدر مملکت کا کہنا تھا کہ  بانی پی ٹی آئی کے حوالے سے نوجوانوں کو گمراہ کیا گیا ہے اور یہ کہتے ہیں سوشل میڈیا نوجوان نسل کو گمراہ کر رہا ہے۔

انہوں نے کہا کہ بیرونی سرمایہ کاری نہیں آئے گی جب تک لوگوں کا آپ پر اعتماد نہیں ہوگا، معیشت کو تباہ نہ کریں، کیا ایم کیو ایم کراچی سے جیت سکتی ہے؟۔

سابق صدر نے کہا کہ برداشت نہ کرنے والا معاملہ بانی پی ٹی آئی کا نہیں ہے، زوم اِن کریں کہ معاملہ کیسے ٹھیک ہو سکتا ہے، قانون کی حکمرانی قائم کرو، مینڈیٹ واپس کرو، بات نہ کرنا کم عقلی ہے۔