پاکستان امریکا سے مجبوری میں میچ ہارا ہے، انور مقصود

نامور مصنف انور مقصود نے ٹی ٹوئٹنی ورلڈکپ میں پاکستان کی امریکا سے شکست پر دلچسپ درعمل دیتے ہوئے کہا کہ پاکستان امریکا سے مجبوری میں میچ ہارا ہے۔

ٹی ٹوئنٹی ورلڈکپ میں امریکا کے خلاف اپنے پہلے میچ میں پاکستان کی شکست پر بات کرتے ہوئے انور مقصود نے کہا کہ پاکستان امریکا سے مجبوری میں میچ ہارا ہے کیونکہ ہمیں آئی ایم ایف سے قرضہ ملنا ہے جو ابھی تک نہیں ملا۔

پاکستان امریکا سے مجبوری میں ہارا ہے، آئی ایم ایف سے ابھی قرضہ ملنا ہے، انور مقصود ?#PakvsUSA pic.twitter.com/hsrgnUYIUl

— Mughees Ali (@mugheesali81) June 6, 2024

انور مقصود نے کہا ہوسکتا ہے کہ آئی ایم ایف نے قرضے کےلئے میچ میں شکست کی بھی شرط رکھی گئی ہو  کہ پہلے امریکا سے میچ ہارو پھر پیسے دیں گے ورنہ پاکستان کے ہارنے کی کوئی اور وجہ سمجھ نہیں آتی۔

9 جون کو  پاکستان اور بھارت کے میچ سے متعلق انہوں نے کہا کہ اب جن پاکستانیوں نے ٹکٹ خریدے ہوئے ہیں وہ آدھی قیمت میں اپنے ٹکٹ بیچیں گے۔

واضح رہے کہ ٹی ٹوئنٹی ورلڈکپ میں امریکا نے پاکستان کو سپر اوور میں شکست دے کر بڑا اپ سیٹ کردیا اور ایونٹ میں مسلسل دوسری کامیابی حاصل کرلی ہے۔

امریکا نے سپر اوور میں پاکستان کو جیت کیلئے 19 رنز کا ہدف دیا تھا اور قومی ٹیم صرف 13 رنز بناسکی تھی۔