ٹی 20ورلڈ کپ کا سب سے بڑا پاک بھارت ٹاکرا آج ہوگا

ٹی 20ورلڈکپ 2024ء میں پاکستان اور بھارت کرکٹ ٹیمیں آج نیویارک کے کرکٹ اسٹیڈیم میں مدمقابل ہوں گی۔

پاکستان کرکٹ ٹیم نے میچ کی تیاریوں کےلیے گزشتہ روز پریکٹس کی جبکہ بھارتی ٹیم کے صرف دو کھلاڑیوں نے آپشنل ٹریننگ سیشن میں حصہ لیا۔

پاکستانی وقت کے مطابق میچ شام ساڑھے 7 بجے شروع ہو گا، امریکا سے شکست کے بعد قومی ٹیم پر کافی دباؤ ہے۔

ٹی 20فارمیٹ میں دونوں ٹیمیں 12 مرتبہ مدمقابل آئی ہیں جن میں سے میچز 8 بھارت کے نام رہے جبکہ 3 میں پاکستان نے فتح حاصل کی۔ ایک میچ ٹائی رہا۔

ٹی 20ورلڈکپ میں امریکا کے ہاتھوں اپ سیٹ شکست کے بعد اب پاکستان کو بغیر کسی اگر مگر کے فائنل تک پہنچنے کےلیے اپنے آئندہ تینوں میچز جیتنے ہیں جن میں سے پہلا امتحان بھارت کے خلاف ہے۔

پاکستان کو میگا ایونٹ کے اگلے مرحلے میں رسائی کیلئے بھارت کو ہر صورت ہرانا ہو گا، آج کا میچ ہارنے کی صورت میں گرین شرٹس کا سپر 8 کا سفر مشکل ہو جائے گا۔

بڑے میچ سے قبل پاکستانی کھلاڑیوں نے بھرپور پریکٹس کی اور میدان میں اپنا خون گرمایا، کوچز کی نگرانی میں بیٹنگ، باؤلنگ اور فیلڈنگ کی مشقیں کی گئیں۔

آج ہونے والے اہم میچ کیلئے قومی ٹیم میں تبدیلی کا فیصلہ کیا گیا ہے، اعظم خان کو ڈراپ کر کے ان کی جگہ کسی دوسرے کھلاڑی کو موقع دیا جائے گا۔