رواں مالی سال کا اقتصادی سروے آج پیش کیا جائے گا

وفاقی وزیر خزانہ محمد اورنگزیب رواں مالی سال کا اقتصادی سروے آج شام کو ساڑھے 5 بجے پیش کریں گے۔

 اقتصادی سروے میں معیشت میں بہتری کے آثار کو اجاگر کیا جائے گا۔ ذرائع کا کہنا ہے کہ اقتصادی سروے میں معیشت کے اہم اعداد وشمار پیش کیے جائیں گے۔

رواں مالی سال اہم معاشی اعشاریوں کا ہدف حاصل نہیں ہوسکا، مالیاتی خسارہ ہدف سے تقریباً 20 فیصد زائد ریکارڈ کیا گیا ہے۔

سروے کے مطابق رواں مالی سال مہنگائی ہدف سے 3.5 فیصد زائد رہی، مہنگائی کا ہدف 21 فیصد تھا،اوسطاً مہنگائی 24.5 فیصد ریکارڈ ہوئی، ٹیکس محصولات میں 30.8 فیصد، برآمدات 10.6 فیصد بڑھیں جبکہ درآمدات میں 2.4 فیصد کمی ہوئی، بیرونی سرمایہ کاری میں 8.1 فیصد اضافہ دیکھنے میں آیا۔

سروے میں کہا گیا کہ رواں مالی سال جی ڈی پی گروتھ کا ہدف حاصل نہیں کیا جا سکا،زرعی شعبے کی گروتھ 6.25 فیصد، صنعتوں کی گروتھ 1.21 فیصد ریکارڈ ہوئی۔

دستاویز میں بتایا گیا ہے کہ مالی سال کے نو ماہ قرضوں اور واجبات میں 4 ہزار 643 ارب کا اضافہ ہوا۔ جس سے قرضے اور واجبات سڑسٹھ ہزار پانچ سو چوبیس ارب روپے تک پہنچ گئے۔