ٹی 20 ورلڈ کپ، امریکا کو ویسٹ انڈیز کے ہاتھوں شکست

ٹی 20ورلڈ کپ کے سپر ایٹ مرحلے میں ویسٹ انڈیز نے امریکا کو 9 وکٹوں سے ہرا دیا۔

تفصیلات کے مطابق برج ٹاؤن میں کھیلے گئے میچ میں ویسٹ انڈیز نے ٹاس جیت کر پہلے بولنگ کرنے کا فیصلہ کیا جس کے جواب میں امریکی ٹیم 128 رنز بنا سکی۔

ہدف کے تعاقب میں ویسٹ انڈیز نے ایک وکٹ کے نقصان پر ہدف 11 ویں اوور میں باآسانی پورا کرلیا۔

امریکا نے پہلے بیٹنگ کرتے ہوئے 19.5 اوورز میں 128 رنز بنائے اور ویسٹ انڈیز کو جیت کے لیے 129 رنز کا ہدف دیا۔ امریکہ کے وکٹ کیپر اینڈرائز گوس نے بہترین بیٹنگ کرتے ہوئے ایک چھکے اور 3 چوکوں کی مدد سے 16 گیندوں پر 29 رنز بنائے۔

نیتش کمار نے 19 گیندوں پر 29 رنز بنائے۔ ہرمیت سنگھ اور سوربھ نیٹرا اولکر بغیر کوئی رنز بنائے پویلین واپس لوٹ گئے۔ آندرے رسل اور روسٹن چیز نے 3، 3 کھلاڑیوں کو آؤٹ کیا۔

ویسٹ انڈیز کی جانب سے شائے ہوپ نے شاندار بیٹنگ کی اور39 گیندوں پر آٹھ چھکوں اور چار چوکوں کی مدد سے 82 رنز بنائے اور ناٹ آؤٹ رہے۔

جانسن چارلس 15 رنز بنا کر ہرمیت سنگھ کی گیند پر کیچ آؤٹ ہوئے، نکولس پورن نے بارہ گیندوں پر 27 رنز بنائے اور ناٹ آؤٹ رہے۔ اس طرح ویسٹ انڈیز نے یہ میچ نو وکٹوں سے جیت لیا۔