کراچی میں باراتیوں سے بھری بس الٹ گئی، خاتون جاں بحق

کراچی کی مصروف ترین شاہراہ فیصل پر باراتیوں سے بھری بس الٹ گئی، حادثے میں خاتون جاں بحق اور متعدد افراد زخمی ہوگئے۔

ذرائع کے مطابق حادثے کی اطلاع ملتے ہی پولیس اور ریسکیو ٹیمیں موقع پر پہنچیں اور زخمیوں کو فوری طبی امداد کے لیے ہسپتال منتقل کیا جہاں ایک خاتون دم توڑ گئیں۔

عینی شاہد کے مطابق بس حادثے میں کئی گاڑیاں بھی زد میں آئیں۔

ذرائع کے مطابق بہادر آباد تھانے کی حدود میں شاہراہ فیصل عوامی مرکز کے قریب باراتیوں کی تیز رفتار بس فٹ پاتھ سے ٹکرانے کے بعد بے قابو ہوگئی اور پیچھے سے آنے والی بارات کی دیگر گاڑیوں کے ساتھ اس کا تصادم ہوا اور بس الٹ گئی جس کے نتیجے میں متعدد افراد زخمی ہوگئے۔

جناح اسپتال میں دوران علاج زخموں کی تاب نہ لاتے ہوئے 38 سالہ نادیہ زوجہ ساجد جاں بحق ہوگئی ،جبکہ حادثہ میں دیگر زخمی ہونے والوں کی شناخت 17 سالہ واصل ولد فراز،25سالہ زینت زوجہ عرفان علی ،،55سالہ نصرت زوجہ اشتیاق 8سالہ میرب دختر صلاحالدین ،6 سالہ میشی دختر صلاح الدین ،29سالہ خدیجہ زوجہ عشرت علی ،،60 سالہ خاتون شمیم،11 سالہ عبدالرزاق ولد لیاقت اور 7 سالہ علی ولد لیاقت شامل ہیں ۔