انسانی حقوق کی پامالیاں، زخمی فلسطینی کو اسرائیلی فوجی جیپ پر باندھ کر شہرمیں گشت

اسرائیلی فوج کی طرف سے فلسطینیوں کے خلاف کارروائیوں میں بین الاقوامی انسانی حقوق کی سنگین پامالیوں کے لا متناعی سلسلے میں ایک تازہ واقعہ سامنے آیا ہے جس نے اسرائیلی فوج کے خلاف تنقید کے دروازے کھول دیے۔

سوشل میڈیا پر گردش کرنے والی ایک ویڈیو میں دیکھا گیا کہ اسرائیلی فوجیوں نے ایک شدید زخمی فلسطینی کو فوجی جیپ کے اگلے حصے پر باندھ رکھا ہے اور گاڑی زخمی فلسطینی کو اسی حال میں غرب اردن کے شمالی شہر جنین میں گشت کررہی تھی۔

سوشل میڈیا پر بڑے پیمانے پر پھیلنے والے اس منظر میں واضح طور پر دیکھا گیا ہے کہ مغربی کنارے کے شمالی شہر جنین میں اسرائیلی فوجی جیپ کے بونٹ پر زخمی نوجوان کو باندھا گیا ہے۔

غیر ملکی میڈیا رپورٹ کے مطابق یہ واقعہ اس وقت سامنے آیا جب اسرائیلی فورسز نے جنین پر حملہ کیا۔ اسرائیلی فوج کی فائرنگ سے متعدد فلسطینی زخمی ہوگئے۔

واضح رہے کہ مغربی کنارے کے علاقے خاص طور پر جنین میں غزہ کی پٹی میں جنگ شروع ہونے سے پہلے ہی اکثر چھاپوں اور گرفتاریوں کے واقعات سامنے آتے رہے ہیں۔