قومی اسمبلی میں آئندہ مالی سال25-2024 کے بجٹ پر بحث جاری

قومی اسمبلی میں آئندہ مالی سال25-2024 کے بجٹ پر بحث جاری ہے ۔

بحث میں حصہ لیتے ہوئے ڈاکٹر مہیش کمار ملانی نے زندگی بچانے والی ادویات پر ٹیکس واپس لینے کی تجویز دی تاہم انہوں نے پرتعیش اشیاء پر ٹیکس عائد کرنے کا خیرمقدم کیا ۔

ڈاکٹر مہیش کمار ملانی نے تمام سیاسی جماعتوں پر زوردیا کہ وہ اپنے اختلافات ختم کریں اور مذاکرات کی میز پر بیٹھیں تاکہ ملک کو بحرانوں سے نکالنے کیلئے مشترکہ حکمت عملی وضع کی جاسکے۔

شاہدہ اختر علی نے صحت اور تعلیم کے شعبوں کیلئے بجٹ بڑھانے کی تجویز دی انہوں نے کارکن طبقہ کی تنخواہوں اورمراعات میں اضافے کی بھی تجویز دی ۔

وزیر دفاع خواجہ محمد آصف نے کہا ہے کہ آئین مذہب اور عقیدے کے امتیاز کے بغیر ہرشہری کے حقوق کا تحفظ کرتا ہے اور مذہب کے نام پرہجوم کے ہاتھوں قتل کی اجازت نہیں دی جاسکتی۔

قومی اسمبلی میں اظہار خیال کرتے ہوئے انہوں نے کہاکہ ملک سے انتہاپسندی اور دہشت گردی کے خاتمے کیلئے آپریشن عزم استحکام شروع کرنے کے فیصلے کو کابینہ کے علاوہ ایوان میں مزید بحث کیلئے پیش کیاجائے گا ۔

انہوں نے کہاکہ حزب اختلاف اپنے تحفظات اور تجاویز ایوان میں پیش کرسکتی ہے۔ انہوں نے مزید کہاکہ خیبرپختونخوا کے وزیراعلی علی امین گنڈا پور گزشتہ روز ایپکس کمیٹی کے اجلاس میں شریک تھے جس میں عزم استحکام کی منظوری دی گئی ۔