لاہور چیمبر نے وفاقی بجٹ کو موجودہ حالات میں متوازن اور خوش آئند قراردیدیا

 وفاقی بجٹ تقریر کے بعد پریس کانفرنس سے خطاب کرتے ہوئے لاہور چیمبر کے صدر میاں طارق مصباح، سینئر نائب صدر ناصر حمید خان اورنائب صدرطاہر منظور چودھری نے کہا کہ خام مال پر ڈیوٹیز کم کرنا اچھی بات ہے۔ اس سے پیداواری لاگت میں کمی آئے گی ۔ ملک میں مینوفیکچرنگ بڑھے گی اور صنعتوں میں مقابلہ کرنے کی صلاحیت بڑھے گی۔ مصنوعات مہنگی ہونے کی وجہ سے عالمی سطح پر مقابلہ نہیں کر پاتی تھیں مگر اب صورتحال بہتر ہوگی۔

انہوں نے کہا کہ لاہور چیمبر کے مطالبے پر فارماسیوٹیکل انڈسٹری کے خام مال پر کسٹمز اور ایڈیشنل کسٹم ڈیوٹیز کم کی گئی ہیں جس سے ادویات کی قیمتیں کم کرنے میں مد دملے گی۔ انہوں نے کہا کہ کسانوں کے لیے پیکیج اچھی بات ہے ، ان کے مسائل حل ہونے سے زرعی شعبہ ترقی کرے گا ، فصلوں کی پیداوار بڑھے گی اور ملک خود کفیل ہوگا۔ اس وقت ستر فیصد آبادی زرعی شعبے سے منسلک ہے۔ ترقیاتی بجٹ میں پچھلے سال کی نسبت چالیس فیصد اضافہ کیا گیا ہے جو خوش آئند ہے۔ اس سے ملک میں معاشی سرگرمیوں میں تیزی آئے گی۔ پاکستان جیسے ترقی پذیر ممالک میں یہ انجن آف گروتھ ہے۔

 لاہور چیمبر کے عہدیداروں نے کہا کہ کنسٹرکشن اور ہاﺅسنگ سیکٹر کو بھی ریلیف دیا گیا ہے جس سے نہ صرف یہ بلکہ اس سے وابستہ صنعتوں کو بھی فائدہ ہوگا۔ سپیشل ٹیکنالوجی زون میں پلانٹس لگانے کے لیے مشینری کو سیلز ٹیکس سے استثنی قرار دینا بہت اچھا قدم ہے۔ اس سے انجینئرنگ اور آئی ٹی سیکٹر کی ترقی میں مدد ملے گی۔ انہوں نے کہا کہ 118ارب روپے ایکسپورٹرز کو ریفنڈ دینے کے لیے رکھے گئے ہیں جس سے ان کے مالی مسائل حل ہونگے۔

انہوں نے کہا کہ کم از کم اجرت بیس ہزار روپے کرنا بہت اچھی بات ہے۔ غریب طبقے کو ریلیف ملے گا۔ سیلف اسیسمنٹ سکیم کی بحالی قابل تعریف ہے۔ انہوں نے کہا کہ گاڑیوں پر ٹیکس کم کرنے سے آٹوموبیل انڈسٹری کو فروغ ملے گا۔ انہوں نے چھوٹے تاجروں کے لیے سکیم کا مطالبہ بھی کیا۔

 ان کا کہنا تھا کہ  ڈیمز کی تعمیر کے لیے 91ارب روپے رکھے گئے ہیں جو بہت کم ہیں۔ پاکستان کو پہلے ہی پانی کی قلت کا سامنا ہے جس کے پیش نظر ذخیرہ کرنے کی صلاحیت بڑھانا ضروری ہے۔ اس کے لیے فنڈز کو بڑھانے کی ضرورت ہے تاکہ ڈیمز کی جلد تعمیر یقینی بنائی جاسکے۔ کرونا کی وجہ سے چیلنجز پیدا ہوئے مگر ٹیکس ٹارگٹ بڑھا دیا گیا، یہ کیسا پورا ہوگا۔ ٹارگٹ نہیں بڑھانا چاہیے تھا۔