کالعدم تحریک طالبان پاکستان کے اہم کمانڈر گرفتار

 خفیہ اور قانون نافذ کرنے والے اداروںنے کالعدم تحریک طالبان پاکستان خوارج کے اہم کمانڈر اور دفاعی شوریٰ کے سرغنہ نصر اللہ عرف مولوی منصور کو گرفتار کرکے ایک بڑی اور اہم کامیابی حاصل کی ہے۔

کارروائی میں کالعدم تحریک طالبان پاکستان خوارج اور بلوچستان میں بلوچستان لبریشن آرمی مجید بریگیڈ کے گٹھ جوڑ کے تحت دہشت گرد سرگرمیوں کے لئے خفیہ ٹھکانے بنانے کا منصوبہ بھی ناکام بنا دیا گیا۔

اپنے انکشافات میں گرفتار کمانڈر نصر اللہ عرف مولوی منصور نے بتایا کہ کالعدم ٹی ٹی پی کا حصہ بننے سے پہلے وہ بیت اللہ محسود کے پلیٹ فارم سے تخریبی کارروائیو ں میں حصہ لیتا رہا۔

اس نے انکشاف کیا کہ آپریشن ضرب عضب کے دوران وہ افغانستان بھاگ گیا تھا۔

کالعدم ٹی ٹی پی کمانڈر نے بتایا کہ اس نے جنوبی وزیر ستان، شمالی وزیر ستان ، ڈیرہ اسماعیل خان اور پا ک افغان سرحد کے ساتھ پاک فوج کی چوکیوں پر دہشت گرد حملے کئے۔

گرفتار کالعدم تحریک طالبان پاکستان کے کمانڈر نے بتایا کہ بھارتی خفیہ ایجنسی '' را'' بلوچستان لبریشن آرمی مجید بریگیڈ اور کالعدم تحریک طالبان پاکستان خوارج کی افغان طالبان کے ذریعے مکمل سر پرستی کررہی ہے۔

انہوں نے کہا کہ بھارتی خفیہ ایجنسی را کالعدم تحریک طالبان پاکستان کو بھرپور مالی معاونت فراہم کررہی ہے۔