راولپنڈی میں دوسری شادی کرنے پر شوہر کے خلاف مقدمہ درج

راولپنڈی میں عدالت نے خود کو کنوارہ ظاہر کر کے دوسری شادی کرنے پر شوہر کے خلاف مقدمہ درج کر لیا گیا ۔مقدمہ ملزم واجد منصور کی دوسری اہلیہ کی مدعیت میں درج کیا گیا۔

متن مقدمہ کے مطابق ملزم نے خود کو کنوارہ ظاہر کرکے مجھ سے دوسری شادی کی جبکہ ملزم پہلے سے شادی شدہ اور ایک بیٹی کا باپ ہے۔ ملزم نے جھوٹ، فراڈ اور دھوکا کے ذریعے اپنے بدنیت عزائم حاصل کرنے کے لیے دوسری شادی کی۔

شوہر کے خلاف تعزیرات پاکستان کے سیکشن465،420 ،495 کے تحت مقدمہ درج کرنے کا حکم دیا گیا، مذکورہ دفعات کے تحت شوہر کو کم سے کم 10 سال کی سزا ہو سکے گی،ایڈیشنل سیشن جج راولپنڈی نے شوہر کے خلاف مقدمہ میں ناقابل ضمانت دفعات شامل کرنے کا بھی حکم دیا تھا۔

پولیس کے مقدمہ درج نہ کرنے پر مدعیہ خاتون نے ایف آئی آرکیلئے عدالت سے رجوع کیا تھا، خاتون کی طرف سے عدالت میں سید عمر سہیل شاہ ایڈووکیٹ، راشد عمر اولکھ ایڈووکیٹ، راجہ شبیر احمد ایڈووکیٹ اور محمد عثمان ایڈووکیٹ نے دلائل دئیے۔

مذکورہ دفعات کے تحت پنجاب میں پہلی بار کسی شوہر پر ایف آئی آر درج ہوئی ہے، ایف آئی آر تھانہ صادق آباد راولپنڈی میں رجسٹرڈ ہوئی۔