پنجاب میں میٹرک سالانہ امتحانات کے نتائج کا اعلان 

لاہور سمیت پنجاب کے دیگر شہروں میں میٹرک کے سالانہ امتحانات کے نتائج کا اعلان کر دیا گیا ہے۔

لاہور بورڈ میں پاس ہونے والے طلبہ کا تناسب 69 فیصد سے زائد رہا۔میٹرک امتحانات میں ایک لاکھ 74 ہزار 500 سے زائد طلباء و طالبات پاس ہوئے۔

چیئرمین لاہور بورڈ آف انٹرمیڈیٹ اینڈ سیکنڈری ایجوکیشن زید بن مقصود نے کہا ہے کہ میٹرک امتحانات میں پہلی پوزیشن آیان کاشف نے حاصل کی، پہلی پوزیشن حاصل کرنے والے طالب علم کا تعلق دانش سکول سے ہے۔

میٹرک امتحانات میں پوزیشن لینے والے طلبہ کے اعزاز میں تقریب بھی منعقد کی گئی، صوبائی وزیر تعلیم رانا سکندر حیات نے پوزیشن ہولڈرز کو میڈل پہنائے اور تعریفی سرٹیفکیٹس تقسیم کیے۔

دوسری جانب راولپنڈی تعلیمی بورڈ نے میٹرک امتحان کے پہلے سالانہ نتائج 2024کا اعلان کر دیا۔ فاطمہ جناح ویمن یونیورسٹی راولپنڈی میں میٹرک امتحان کے پہلے سالانہ نتائج 2024 کے حوالے سے خصوصی تقریب منعقد کی گئی۔

علاوہ ازیں تعلیمی بورڈ ملتان میں میٹرک کے سالانہ امتحانات کے نتائج کے مطابق پہلی دو پوزیشنز پر لڑکوں کا قبضہ رہا، انس جاوید نے 1191 نمبرز حاصل کرکے پہلی پوزیشن حاصل کرلی ،1190 نمبرز کے ساتھ محمد فیضان شوکت نے دوسری، 1188 نمبرز کے ساتھ رانیہ شاہد نے تیسری پوزیشن حاصل کی۔

اس کے علاوہ فیصل آبادتعلیمی بورڈ نے بھی میٹرک 2024 کے نتائج کا اعلان کر دیا ،ڈی پی ایس کی طالبہ عروج فاطمہ 1189 نمبر لے فرسٹ رہیں ،1187 نمبر کے ساتھ دو لڑکوں محمد فائق اور علی احمد نے دوسری پوزیشن حاصل کی۔

کامیابی کا تناسب 79.75 فیصد رہا ، ایجوکیشن بورڈ پوزیشن ہولڈرز کے اعزاز میں ڈی پی ایس سکول میں تقریب منعقد کی ، تقریب میں پوزیشن ہولڈرز کو میڈلز سرٹیفکیٹ اور کیش پرائز دیئے گئے۔

گوجرانوالہ تعلیمی بورڈ نے بھی میٹرک فرسٹ اینول امتحانات 2024 کے نتائج اور پوزیشنز ہولڈرز امیدواروں کے ناموں کا اعلان کردیا، ٹاپ پوزیشنز ہولڈرز کے اعزاز میں پروقار تقریب کا انعقاد کیا گیا۔

تقریب میں چیئرمینتعلیمی بورڈ کمشنر گوجرانوالہ نے خصوصی شرکت کی،تقریب میں والدین اور ٹیچرز نے بھرپور شرکت کی ،کمشنر گوجرانوالہ نے ٹاپ پوزیشنز ہولڈرز میں انعامات تقسیم کیے ، امتحان میں مجموعی طور پر 2 لاکھ 24 ہزار 536 امیدواروں نے شرکت کی۔