شدید بارشوں کے باعث سیلاب کا خدشہ ، پی ڈی ایم اے کا الرٹ جاری

پی ڈی ایم اے نے پنجاب میں شدید بارشوں کے باعث سیلابی صورتحال کا خدشہ ظاہر کرتے ہوئے الرٹ جاری کر دیا۔

حکومت نےآئندہ چند ہفتوں میں سیلابی صورتحال کے امکان کے پیش نظر حادثات سے بچنے کے لیے تمام متعلقہ محکموں سے ایکشن پلان مانگ لیا۔

ذرائع کے مطابق آئندہ 48 گھنٹوں کے اندر دریائے راوی کے ندی نالوں میں پانی کا بہاؤ بڑھے گا، جس سے سیلابی صورتحال پیدا ہو سکتی ہے۔  

پی ڈی ایم اے کے مطابق دریائے چناب کے بالائی علاقوں میں بھی پانی کے بہاؤ میں اضافہ متوقع ہے، جس کے نتیجے میں دریائے چناب کے قریبی علاقوں میں شدید سیلاب کے آنے کا امکان ہے۔

15 جولائی تک ڈیرہ غازی خان اور راجن پور کے پہاڑی سلسلے میں نچلے درجے کی فلیش فلڈنگ کا امکان ظاہر کیا جا رہا ہے۔

دوسری جانب حکومت نے ممکنہ سیلاب سے بچاؤ کے اقدامات کے لیے متعلقہ محکموں میں ایمرجنسی نافذ کر دی۔

کسی بھی ہنگامی صورتحال سے بچنے کے لیے ندی نالوں کے مضافات میں رہنے والے لوگوں کو نقل مکانی کرنے کے احکامات جاری کر دیے گئے۔