چینی سرمایہ کاری سے معیشت بہتر ہوگی روزگار کے نئے مواقع پیدا ہونگے ، وزیر اعظم

وزیراعظم شہبازشریف نے کہا ہے کہ چینی صنعتوں کی پاکستان میں منتقلی سے معیشت بہتر ہوگی روزگار کے نئے مواقع پیدا ہوںگے اور برآمدات میں اضافہ ہوگا۔

انہوں نے یہ بات ہفتہ کے روز اسلام آباد میں ایک اجلاس کی صدارت کرتے ہوئے کہی جس میں وزیراعظم کے دورہ چین کے موقع پر ہونے والے سمجھوتوں پر پیشرفت کا جائزہ لیا گیا۔

وزیراعظم نے کہا کہ چین کے ساتھ تعاون کے بارے میں مفاہمت کی یادداشتوں پر عملدرآمد میں کوئی تاخیر برداشت نہیں کی جائیگی۔

انہوںنے کہاکہ چین پاکستان کا دیرینہ دوست ہے جس نے ہر مشکل وقت میں پاکستان کی مدد کی ہے اور چینی قیادت نے پاکستان میں سرمایہ کاری میں مزید اضافے کا تہیہ کررکھا ہے۔

اس موقع پر چینی چینی صنعتوں کی پاکستان منتقلی کیلئے جامع لائحہ عمل پیش کیا گیا جس کے تحت چینی کمپنیوں کے ساتھ اشتراک عمل کے معاہدوں پر دستخط ہوںگے جن کے نتیجے میں چین کی ٹیکسٹائل، پلاسٹک، چمڑے، میڈیکل اور آلات جراحی کی صنعتیں پاکستان منتقل کی جائیںگی۔

سرمایہ کاری بورڈ نے اس مقصد کیلئے اٹھہتر پاکستانی کمپنیوں کے چینی کمپنیوں کے ساتھ تعاون کیلئے اظہار دلچسپی کے بارے میں پیشرفت کی رپورٹ پیش کی۔

وزیراعظم نے اس سلسلے میں سرمایہ کاری بورڈ کے اقدامات دو سفارشات کی تعریف کی۔

انہوں نے متعلقہ حکام کو ہدایت کی کہ چینی کمپنیوں کے ساتھ تعاون کے لئے پاکستانی کمپنیوں کو مکمل سہولت فراہم کریں۔