لاہور سمیت پنجاب مختلف شہروں میں کہیں ہلکی اور کہیں موسلادھار بارش

لاہور: پنجاب کے مختلف شہروں میں گرج چمک کے ساتھ ہونے والی بارشوں نے گرمی کا زور توڑ دیا ہے۔

لاہور کے علاقے ایبٹ روڈ، لکشمی چوک، شالیمار، گڑھی شاہو، مال روڈ، کینال روڈ، ہربنس پورہ، ساندہ، اسلام پورہ اور گردو نواح میں زوروں کی بارش ہوئی۔ بارش کے دوران لاہور کے کئی علاقوں میں بجلی کی فراہمی بھی متاثر ہوئی۔

لاہور کے علاوہ اسلام آباد، راولپنڈی، مری، جہلم، مریدکے، گوجرانوالہ، اٹک، وزیر آباد سمیت پنجاب کے دیگر متعدد شہروں میں بھی ہلکی اور تیز بارش ہوئی۔ بارشوں کے بعد موسم خوشگوار ہو گیا۔ تاہم، شدید بارشوں کے باعث سڑکیں ندی نالوں کا منظر پیش کرنے لگیں۔

دوسری جانب، نیشنل ڈیزاسٹر مینجمنٹ اتھارٹی (این ڈی ایم اے) نے بارشوں کے باعث اگلے تین دنوں کے دوران پنجاب کے اضلاع نارووال اور سیالکوٹ میں ہائی لیول فلیش فلڈنگ کا خدشہ ظاہر کیا ہے۔ این ڈی ایم اے کے مطابق، جموں کے بالائی علاقوں میں بارشوں کے باعث نارووال اور سیالکوٹ کے ندی نالوں میں سیلاب آ سکتا ہے۔

این ڈی ایم اے نے صوبائی ڈیزاسٹر مینجمنٹ اتھارٹیز اور مقامی انتظامیہ کو چوکس رہنے اور خطرے سے دوچار آبادی کی حفاظت کے لیے ضروری اقدامات کرنے کی ہدایت کی ہے۔