مانچسٹر ایئرپورٹ پر پاکستانی نژاد شہریوں پر پولیس کا تشدد

مانچسٹر: مانچسٹر ایئرپورٹ پر برطانوی پولیس اہلکاروں نے پاکستانی نژاد شہریوں کو تشدد کا بنا ڈالا۔

برطانوی شہر مانچسٹر کے ایئرپورٹ پر پاکستانی نژاد شہریوں کے ساتھ پولیس تشدد کی ویڈیوز سامنے آنے کے بعد انٹرنیشنل میڈیا میں ہلچل مچ گئی ہے۔ ان ویڈیوز میں دیکھا جا سکتا ہے کہ مانچسٹر ایئرپورٹ کے ٹرمینل ٹو پر قطر سے واپس آنے والے ایک پاکستانی خاندان کے ارکان کو برطانوی پولیس نے تشدد کا نشانہ بنایا ہے۔

رپورٹ کے مطابق واقعہ مانچسٹر ایئرپورٹ کے ٹرمینل ٹو پر پیش آیا جس میں قطر سے واپس آنے والی فیملی کے اراکین کو پولیس نے تشدد کا نشانہ بنایا۔

ویڈیوز میں واضح طور پر دیکھا گیا کہ ایک نوجوان کو پیچھے ہاتھ باندھ کر زمین پر لٹایا گیا ہے اور مانچسٹر پولیس کا ایک اہلکار اس کے سر پر لاتیں مار رہا ہے۔ متاثرہ نوجوان کے گرد دیگر مرد اور ایک خاتون اہلکار بھی موجود ہیں۔ اس کے علاوہ، زمین پر لٹائے گئے نوجوان کے قریب گھرانے کی ایک بوڑھی خاتون بھی بیٹھی تھی۔

خاتون اہلکار کی کال پر پولیس کے دیگر اہلکار بھی موقع پر پہنچے اور انہوں نے ایک شخص کو زمین پر اوندھے منہ جبکہ دوسرے کو ہاتھ اوپر کر کے قریب میں کرسی پر بیٹھا دیا تھا۔

واقعے کی فوٹیج بنانے والے شخص رفیق کے مطابق تقریباً دس کے قریب اہلکاروں نے نوجوان کو تشدد کا نشانہ بنایا۔ اس دوران ایئرپورٹ پر موجود تمام ہی لوگ خوفزدہ ہوئے اور وہاں پر بھگدڑ بھی مچی۔

اس واقعے پر مانچسٹر پولیس نے مؤقف دیتے ہوئے کہا ہے کہ ایئرپورٹ پر دو مسافروں کے درمیان جھگڑا ہورہا تھا جس کو ایک خاتون اہلکار نے روکنے کی کوشش کی تو مسافر کی جانب سے خاتون اور دیگر دو اہلکاروں پر تشدد کیا گیا جس کے نتیجے میں خاتون کی ناک کی ہڈی ٹوٹی جبکہ دیگر دو زخمی ہوئے جنہیں طبی امداد کے لیے ہسپتال منتقل کردیا گیا۔

پولیس کے مطابق وقوعہ سے پولیس نے ہنگامہ آرائی کرنے والے چار افراد کو حراست میں لیا ہے جبکہ پانچ اہلکاروں کو معطل کر کے 7 اہلکاروں کے خلاف ویڈیوز کی روشنی میں تحقیقات شروع کردی گئیں ہیں۔