اقوام متحدہ کابھارت میں انسانی حقوق کی صورتحال پر تشویش کا اظہار 

نیویارک: اقوام متحدہ نے بھارت میں انسانی حقوق کی صورتحال پر شدید تشویش کا اظہار کیا ہے۔ یو این ہیومن رائٹس کمیٹی نے بھارت میں مذہبی اقلیتوں، بشمول مسلمانوں، مسیحیوں، اور نچلی ذات کے افراد کے حوالے سے تشویش ظاہر کرتے ہوئے کہا ہے کہ مقبوضہ جموں کشمیر، آسام، اور منی پور کے کچھ اضلاع میں انسداد دہشت گردی قوانین کے نفاذ پر بھی شدید تشویش ہے۔

یو این ہیومن رائٹس کمیٹی نے بھارت سے مطالبہ کیا ہے کہ وہ فوراً امتیازی قوانین کا خاتمہ کرے اور اپنے سول ملازمین، قانون نافذ کرنے والے اداروں، عدلیہ، اور کمیونٹی لیڈرز کو مناسب تربیت فراہم کرے۔ کمیٹی کا کہنا ہے کہ بھارت کے انسداد دہشت گردی قوانین اور مسلح افواج کا سپیشل پاورز ایکٹ بین الاقوامی قوانین سے متصادم ہے۔

مقبوضہ جموں کشمیر، آسام، اور منی پور میں کئی دہائیوں سے نافذ انسداد دہشت گردی قوانین انسانی حقوق کی وسیع پیمانے پر خلاف ورزیوں کا سبب بنے ہیں۔ ان علاقوں میں طاقت کے بے دریغ استعمال کے نتیجے میں غیر قانونی ہلاکتیں، حراستیں، جنسی تشدد، جبری گمشدگیاں، اور تشدد عام ہے۔

یو این ہیومن رائٹس کمیٹی نے بھارت سے انسداد دہشت گردی قوانین کو بین الاقوامی اصولوں اور ضابطوں کے مطابق بنانے کا مطالبہ کیا ہے اور کہا ہے کہ بھارت یہ یقینی بنائے کہ متاثرہ علاقوں میں انسداد دہشت گردی قوانین کا اطلاق عارضی، مناسب اور عدالتی دائرہ کار کے تحت ہو۔

کمیٹی نے بھارت پر زور دیا ہے کہ وہ متاثرہ علاقوں میں ایک مؤثر میکنزم تشکیل دے جو انسانی حقوق کی خلاف ورزیوں کے ذمہ داروں کا تعین کر سکے۔