صدرمملکت آصف علی زرداری نے دولت مشترکہ کی سیکرٹری  جنرل پیٹریشیا اسکاٹ لینڈ سے ملاقات میں کہا ہے تنظیم کی اہمیت اجاگر کرتے ہوئے کہا کہ دولت مشترکہ کے ساتھ تعاون مضبوط کرنے کی ضرورت ہے۔

ایوان صدر سے جاری بیان میں کہا گیا کہ صدر آصف علی زرداری سے دولت مشترکہ کی سیکرٹری  جنرل پیٹریشیا اسکاٹ لینڈ کی قیادت میں وفد نے ملاقات کی۔

ملاقات کے دوران صدر مملکت نے موسمیاتی تبدیلی، تعلیم، پارلیمانی تبادلوں اور قدرتی آفات کے شعبوں میں مضبوط تعاون کی ضرورت پر زور دیا اور کہا کہ پارلیمانی اداروں، خاص طور پر نوجوان پارلیمنٹرینز اور طلبہ کے مابین روابط بڑھانا ہوں گے۔

صدر مملکت آصف علی زرداری نے کہا کہ پاکستان دولت مشترکہ کا بانی رکن ہونے کے ناطے تنظیم کو بہت اہمیت دیتا ہے، ملاقات میں پاکستان پر موسمیاتی تبدیلیوں کے اثرات پر بھی تبادلہ خیال کیا گیا۔

انہوں نے کہا کہ پاکستان کو موسمیاتی تبدیلیوں سے بہت نقصان اٹھانا پڑا، موسمیاتی تبدیلی کے اثرات کم کرنے کے لیے سندھ میں 20 لاکھ سے زائد مینگرووز لگائے گئے۔

دولت مشترکہ کی سیکریٹری جنرل سے گفتگو کے دوران صدر مملکت نے کہا کہ بین الاقوامی مارکیٹ میں کاربن کریڈٹ کی تجارت سے 27 ملین ڈالر کمائے گئے۔

انہوں نے کہا کہ حکومت سندھ نے 2022 کے سیلاب کے پیش نظر 20 لاکھ پائیدار مکانات کی تعمیر شروع کر دی۔

سیکریٹری جنرل دولت مشترکہ پیٹریشیا اسکاٹ لینڈ نے کہا کہ پاکستان کو موسمیاتی تبدیلی سے منسلک بڑے چیلنجز کا سامنا ہے۔

سیکریٹری جنرل نے تنظیم کے پاکستان کے ساتھ متحرک تعاون  پر بھی روشنی ڈالی اور صدر مملکت نے 2022 کے تباہ کن سیلاب کے نتیجے میں پاکستان کے لیے پیٹریشیا اسکاٹ لینڈ کی خدمات کو سراہا۔

 درہ آدم خیل پرانے بازی خیل میں بارش کے ریلے کا پانی گھر کے تہہ خانے میں داخل ہوگیا جس سے ایک ہی خاندان کے 11 افراد جاں بحق ہوگئے۔
ریسکیو ذرائع کے مطابق بارش کے پانی میں ڈوب جانے والے تمام افراد کی نعشیں نکال لی گئیں۔
تفصیلات کے مطابق پرانا بازی خیل میں امجد نامی شخص کے گھر کے تہہ خانے میں بارش کا پانی داخل ہو گیا تھا ، جاں بحق ہونے والوں میں3خواتین 2مرد اور6بچے شامل ہیں۔
وزیراعلیٰ خیبرپختونخوا علی امین گنڈا پور نےدرہ آدم خیل میں ایک ہی خاندان کے11افراد کےجاں بحق ہونے پر افسوس کا اظہار کیا ہے۔
وزیر اعلیٰ نےلواحقین سے دلی ہمدردی اور تعزیت کا اظہار کیا، وزیر اعلیٰ نےجاں بحق افراد کی مغفرت اور پسماندگان کے لئے صبر جمیل کی دعا کی۔

وفاقی وزیرداخلہ محسن نقوی کا درہ  آدم خیل میں گھر میں پانی بھر جانے سے 11 افراد کے جاں بحق ہونے کے افسوسناک واقعہ پر گہرے دکھ  اور افسوس کا اظہار ، وزیر  داخلہ محسن نقوی کا جاں بحق افراد کے لواحقین سے دلی ہمدردی اور تعزیت کا اظہار، وزیر  داخلہ محسن نقوی نے ملک بھر میں بارشوں کے باعث مختلف حادثات میں جانی نقصان پر افسوس کا اظہار کیا ۔

لاہور : پاکستان اسٹاک ایکسچینج (پی ایس ایکس) میں آج بھی تیزی کا رجحان برقرار ہے۔ ابتدائی ٹریڈنگ میں بینچ مارک کے ایس ای-100 انڈیکس میں 523 پوائنٹس کا اضافہ دیکھا گیا ہے۔

پی ایس ایکس کی ویب سائٹ کے مطابق، تقریباً صبح 11 بجے کے ایس ای-100 انڈیکس 523 پوائنٹس یا 0.67 فیصد بڑھ کر 79 ہزار 151 پوائنٹس پر پہنچ گیا جو گزشتہ روز 78 ہزار 628 پر بند ہوا تھا۔

واضح رہے کہ 29 جولائی کو بھی انڈیکس 798 پوائنٹس یا 1.02 فیصد اضافے کے بعد 78 ہزار 827 پوائنٹس پر پہنچ گیا تھا۔

ماہرین کا کہنا ہے کہ اس تیزی کی مختلف وجوہات ہیں جن میں سرمایہ کاروں کا اعتماد بحال ہونا، اقتصادی صورتحال میں بہتری کی امیدیں اور عالمی مارکیٹوں میں مثبت رجحان شامل ہیں۔