وزیراعلیٰ پنجاب نے  ’’اپنی چھت، اپنا گھر‘‘ پراجیکٹ کے 3 ماڈلز کی منظوری دیدی

لاہور: وزیراعلیٰ پنجاب مریم نواز نے صوبے میں گھروں کی تعمیر کے لیے شروع کیے گئے’’اپنی چھت، اپنا گھر‘‘ پراجیکٹ کے تین نئے ماڈلز کی منظوری دے دی ہے۔

وزیراعلیٰ پنجاب کی زیر صدارت ایک خصوصی اجلاس میں اس پراجیکٹ کا جائزہ لیا گیا۔ اجلاس میں بتایا گیا کہ حکومت نے اس پراجیکٹ کے لیے ایک آن لائن پورٹل تیار کر رہی ہے جس کے ذریعے لوگ گھر بیٹھے درخواستیں جمع کرا سکیں گے۔ اس کے علاوہ، ایک تا پانچ مرلہ کے پلاٹ مالکان گھر بنانے کے لیے بلاسود قرضہ حاصل کر سکیں گے۔

وزیراعلیٰ نے اس بات کو یقینی بنانے کا حکم دیا ہے کہ گھر کے مالکان کو آسان قسطوں میں قرضہ ادا کرنے کی سہولت ملے۔ حکومت سرکاری زمین پر گراؤنڈ اور تین منزلہ اپارٹمنٹس کے پروگرام پر بھی کام کر رہی ہے۔

پنجاب حکومت نجی ہاؤسنگ سکیموں میں گھر کی لاگت کو کم کرنے کے لیے سبسڈی بھی دے گی۔ اس طرح کسی بھی شہر یا گاؤں میں 70 ہزار پلاٹ مالکان قرض لے سکیں گے۔

وزیراعلیٰ نے پلاٹ پر قرض حاصل کرنے والوں سے سروس چارجز لینے سے بھی روک دیا ہے۔ مائیکروفنانس اداروں کے ذریعے قرض کی ادائیگی پر سروس چارجز حکومت پنجاب ادا کرے گی۔

وزیراعلیٰ نے عوام کی سہولت کے لیے ایک ٹول فری نمبر متعارف کرانے کا بھی حکم دیا ہے۔