امریکا کا بنگلہ دیش میں عبوری حکومت کے قیام کا خیر مقدم

امریکا نے بنگلہ دیش میں حالیہ پرتشدد صورتحال اور سابق وزیراعظم شیخ حسینہ واجد کے استعفے کے بعد عبوری حکومت کے قیام کا خیرمقدم کرتے ہوئے تمام فریقین سے تحمل اور پرامن رہنے کی اپیل کی ہے۔

شیخ حسینہ واجد نے جولائی کے اوائل سے ملک بھر میں حکومت مخالف مظاہروں کو روکنے کی کوشش کی، لیکن اتوار کو سول نافرمانی کی تحریک کے دوران پولیس اور مظاہرین کے درمیان جھڑپوں میں تقریباً 100 افراد جاں بحق ہو گئے۔ ملک بھر میں جاری پرتشدد مظاہروں میں 300 سے زائد افراد کی ہلاکت کے بعد، حسینہ واجد نے وزارت عظمیٰ سے استعفیٰ دے دیا اور بھارت روانہ ہو گئیں۔ بنگلہ دیش کے آرمی چیف قمرالزمان نے ملک میں عبوری حکومت کے قیام کا اعلان کیا۔

امریکی محکمہ خارجہ کے ترجمان میتھو ملر نے واشنگٹن میں پریس بریفنگ کے دوران کہا کہ امریکا بنگلہ دیش کی صورتحال کا محتاط جائزہ لے رہا ہے اور عبوری حکومت کے قیام کا خیرمقدم کرتا ہے۔ انہوں نے کہا، "ہم بنگلہ دیش کے عوام کے ساتھ ہیں اور تمام فریقین سے پرامن رہنے اور تشدد سے گریز کرنے کی اپیل کرتے ہیں۔ اقتدار کی منتقلی جمہوری، اجتماعی اور بنگلہ دیشی قوانین کے مطابق ہونی چاہیئے۔"

میتھو ملر نے انسانی حقوق کی خلاف ورزیوں، ہلاکتوں اور زخمی ہونے کی اطلاعات پر تشویش کا اظہار کیا اور کہا کہ امریکا بنگلہ دیش میں پیاروں کو کھودینے والوں سے دلی تعزیت کرتا ہے۔

واضح رہے کہ شیخ حسینہ واجد کے امریکا کے ساتھ اچھے تعلقات رہے ہیں، جہاں انہوں نے اسلامی انتہا پسندی کا مقابلہ کرنے اور میانمار کے روہنگیا پناہ گزینوں کو پناہ دینے جیسے اقدامات کیے جسے امریکا کی جانب سے سراہا گیا۔