مریم نواز کی ہدایت پر بجلی چوروں کیخلاف کریک ڈاؤن

لاہور: وزیر اعلیٰ پنجاب مریم نواز شریف کی ہدایت پر پنجاب پولیس نے بجلی چوری کے خلاف بڑے پیمانے پر کریک ڈاؤن شروع کر رکھا ہے۔ صوبے بھر میں بجلی چوری کے خلاف سخت کارروائی کرتے ہوئے پولیس نے ہزاروں مقدمات درج کیے اور ہزاروں ملزمان کو گرفتار کیا ہے۔

 رواں سال لاہور سمیت صوبہ بھر میں بجلی چوری کے 63 ہزار 137 مقدمات درج کیے گئے۔ پولیس نے صوبہ بھر سے بجلی چوری میں ملوث 33 ہزار 845 ملزمان کو گرفتار کیا۔ بجلی چوری کے 39 ہزار 300 سے زائد مقدمات کے چالان مکمل ہوئے۔

 قومی خزانے کو نقصان پہنچانے والے 5295 ملزمان کو سزائیں اور جرمانے کروائے گئے۔ صوبائی دارالحکومت لاہور میں اکیلے 18479 مقدمات درج کیے گئے اور 18250 ملزمان کو گرفتار کیا گیا۔

آئی جی پنجاب ڈاکٹر عثمان انور نے صوبہ بھر میں بجلی چوری کے خلاف کریک ڈاؤن کو مزید سخت کرنے کی ہدایت کی ہے۔ انہوں نے کہا کہ بجلی چوری کے مقدمات کے چالان کی شرح کو مزید بہتر بنایا جائے اور زیادہ سے زیادہ اشتہاریوں کو قانون کی گرفت میں لایا جائے۔ انہوں نے یہ بھی کہا کہ بجلی چوری کرنے والوں سے ریکوری کے لیے لیسکو اور متعلقہ افسران کے اشتراک سے سخت لائحہ عمل اپنایا جائے۔

آئی جی پنجاب نے واضح کیا کہ قومی خزانے کو نقصان پہنچانے والے ملزمان کے خلاف زیرو ٹالرنس کی پالیسی اپنائی جائے گی اور بلا امتیاز کارروائیاں جاری رکھی جائیں گی۔بجلی چوری سے نہ صرف قومی خزانے کو نقصان پہنچتا ہے بلکہ یہ ملک کی ترقی میں بھی رکاوٹ ہے۔ حکومت کی یہ کوشش بجلی چوری کو روکنے اور قومی دولت کو بچانے کے لیے ایک اہم قدم ہے۔