ڈیجیٹلائزیشن ویژن کے تحت معیشت اور گورننس کو ڈیجیٹلائز کیاجا رہا ہے ، شزہ فاطمہ

انفارمیشن ٹیکنالوجی اور ٹیلی مواصلات کی وزیر مملکت شزہ فاطمہ خواجہ نے کہا ہے کہ حکومت ڈیجیٹل پاکستان وژن کو عملی شکل دینے کیلئے پرعزم ہے۔

انہوں نے آج(بدھ) کو اسلام آباد میں ڈیجیٹل نیشن سمٹ سے خطاب کرتے ہوئے کہا کہ وزیراعظم کے ڈیجیٹلائزیشن ویژن کے تحت معیشت، گورننس اور معاشرے کو ڈیجیٹلائز کیا جارہا ہے۔

انہوں نے کہا کہ ملک میں اطلاعاتی ومواصلائی ٹیکنالوجی کی ترقی کیلئے موثر اقدامات کئے جارہے ہیں۔

انہوں نے کہاکہ حکومت قومی آئی ٹی پالیسی پر کام کررہی ہے جس کا مقصد اس شعبے میں معاشی سرگرمیوں کو تیز کرنے کیلئے کاروبار کو آسان بنانا اور ٹیکسوں میں رعایت دینا ہے۔

وزیرمملکت نے کہا ملک میں اسی فیصد سے زائد علاقے میں ٹیلی فونک خدمات کی فراہمی کا قابل قدر ہدف حاصل کرلیا گیا ہے اور اس وقت فون صارفین کی تعداد انیس کروڑ ہوچکی ہے۔