پنجاب حکومت ریلیف کے لئے بجلی کی تقسیم کار کمپنیوں کو ایڈوانس ادائیگی کا فیصلہ

پنجاب حکومت نےبجلی فی یونٹ 14 روپے ریلیف کے معاملے پر 5 بجلی تقسیم کار کمپنیوں کو ایڈوانس ادائیگی کا فیصلہ کر لیا۔

حکومت نے اس سلسلے میں تقسیم کار کمپنیوں سے بجلی کی فی یونٹ 14 روپے ریلیف پر آنے والی مجموعی رقم کی تفصیلات طلب کیں ہیں، ڈسکوز سے 19 اگست تک ریلیف کے لیے درکار مالی ضروریات کا تخمینہ مانگا گیا ہے۔

وزیر اعلی پنجاب مریم نواز شریف کی ہدایت پر صوبہ پنجاب کو بجلی فراہم کرنے والی 5 کمپنیوں کو خط لکھے گئے ہیں، یہ خط لاہور، اسلام آباد، فیصل آباد، ملتان اور گوجرانوالہ الیکٹرک کمپنیوں کو لکھے گئے ہیں۔

خط کے مطابق 14 روپے فی یونٹ کمی کے حکومتی پیکج کی رقم سے آگاہ کیا جائے، آئیسکو، میپکو، گیپکو، فیسکو ، لیسکو 201 سے 500 یونٹ استعمال کرنے والے شہریوں کے بجلی بلوں میں کمی کریں گی اور بجلی کی اصل لاگت اور ریلیف کے درمیان رقم پنجاب حکومت ادا کرے گی ۔

واضح رہے کہ 2 روز قبل سابق وزیراعظم اور مسلم لیگ ن کے صدر نواز شریف اور مریم نواز نے پنجاب میں 500 یونٹ تک کے بجلی صارفین کے لیے 14 روپے فی یونٹ کمی کا اعلان کیا اور کہا تھا کہ صوبائی حکومت یہ بوجھ اٹھائے گی۔