حکمران سن لیں عوام مطمئن نہیں ہیں، مولانا فضل الرحمان

جمعیت علماء اسلام ف کے سربراہ مولانا فضل الرحمان نے کہا ہے کہ حکمران سن لیں عوام مطمئن نہیں ہیں، اپنی سر زمین کے وسائل پر قبضہ نہیں ہونے دیں گے۔

لکی مروت میں جلسے سے خطاب کے دوران مولانا فضل الرحمان نے کہا کہ اپنی سر زمین کے وسائل پر قبضہ نہیں ہونے دیں گے، ہم امن چاہتے ہیں کہ چاہتے ہیں کہ غریبوں کا احساس کیا جائے۔ حکمران سن لیں عوام مطمئن نہیں،تم نے الیکشن کرا دیئے مگر ہم کو یہ الیکشن قبول نہیں،ہم دھاندلی کی بنیاد پر منتخب لوگوں کو عوام کا نمائندہ تصور نہیں کر سکتے، تم نے عوام ووٹ کے حق سے محروم رکھا لیکن ایسا نہیں چل سکتا۔

سربراہ جے یو آئی نے کہا کہ میرے حقوق پر کسی کو قبضے کی اجازت نہیں دی جا سکتی،ملک کے وسائل پر یہاں کے بچوں اور آنے والی نسلوں کا حق ہے۔عوام مطمئن نہیں،اس طرح معاملات نہیں چلیں گے۔ اصلی اور نقلی حکمرانوں کو بتانا چاہتا ہوں پاکستان کے وسائل پر حق پاکستانی عوام کا ہے۔

جے یو آئی کے سربراہ نے کہا کہ امریکا دہشت گردی کا خود خالق ہے، امریکا نے پوری دنیا میں خود جنگ چھیڑی ہوئی ہے۔کسی کا باپ بھی ہمارے بچوں کے حقوق پر قبضہ نہیں کر سکے گا، عالمی قوتیں ہماری مذہبی شناخت ختم کرنا چاہتی ہیں۔

مولانا نے مزید کہا کہ عالمی قوتیں معاشی جنگ پاکستان کی سرزمین پرلڑنا چاہتی ہیں، یہ کس عالمی قوت کے اشارے پر چین کی سرمایہ کاری ضائع کر رہے ہیں، آج چین اور سعودی عرب ہم پراعتماد کرنے کو تیار نہیں۔