بیرون ممالک سے لوگ پاکستان علاج کیلئے آرہے ہیں ، وزیر اعلی سندھ

وزیراعلیٰ سندھ مراد علی شاہ کا کہنا ہے کہ 15 ملکوں سے لوگ علاج کیلئے یہاں آرہے ہیں۔

وزیراعلیٰ سندھ مراد علی شاہ نے جناح اسپتال میں نئے یونٹس کی اقتتاحی تقریب سے خطاب کرتے ہوئے کہا ہے کہ نئےسائبر نائف پر41 لاکھ ڈالر لاگت آئی ہے، عوام کو صحت کی سہولیات فراہم کر رہے ہیں۔

انہوں نے کہا کہ وہ سہولیات دیں گے جو 50 سال میں عوام کو نہ مل سکیں، 15 ملکوں سے لوگ علاج کیلئے یہاں آرہے ہیں، 18 ویں ترمیم کے بعد 3 بڑے اسپتال ہمارے پاس آئے، تینوں اسپتالوں میں بستروں کی تعداد4 ہزار پر لے گئے۔

مراد علی شاہ نے کہا کہ جو 50 سال میں نہیں ہوا وہ 7،8 سال میں کر کے دکھایا، کوئی بھی پرائیویٹ اسپتال 25 فیصد سے کم میں سہولیات نہیں دیتا، ہم نے سوچا اپنے اسپتالوں کو بہترکیوں نہ کریں۔

وزیراعلیٰ سندھ نے کہا کہ ہیلتھ انشورنس کا مطلب پرائیویٹ اسپتال سہولتیں دیں، سندھ بھر کے اسپتالوں میں نئے یونٹس قائم کیے، ہرسال 100 نئے بیڈز کا اضافہ کر رہے ہیں، ہم پرائیویٹ پارٹنرشپ کے تحت کام کر رہے ہیں۔

انہوں نے کہا کہ سائبر نائف کی پہلی مشین 2017 میں لائی گئی، پاکستان کے کسی بھی اسپتال میں یہ مشین نہیں ہے، بلاول بھٹو مجھ سے ناراض ہیں، کہتےہیں میڈیا پر اپنے کاموں کی تشہیرکیوں نہیں کرتے، اگرسارا دن میڈیا پر آؤں گا تو کام کب کروں گا۔