کارساز حادثہ: عدالت نے ملزمہ نتاشا کو 14 روزہ عدالتی ریمانڈ پر جیل بھیج دیا

کراچی : کراچی کے کارساز روڈ پر ہونے والے ٹریفک حادثے میں باپ بیٹی کو قتل کرنے کا الزام لگنے والی ملزمہ نتاشا کو عدالت نے 14 روزہ عدالتی ریمانڈ پر جیل بھیج دیا ہے۔

پولیس نے ملزمہ نتاشا کو عدالت میں پیش کرتے ہوئے ان کے 14 روزہ ریمانڈ کی استدعا کی۔

دوران سماعت تفتیشی افسر نے مؤقف اپنایا کہ مقدمے میں قتل بالسبب کی دفعہ 322 کا اضافہ کیا ہے، دفعہ 322 ناقابل ضمانت ہے۔

بعد ازاں عدالت نے آئندہ سماعت پر تفتیشی افسر کو چالان پیش کرنے کا حکم دینے ہوئے ملزمہ کو عدالتی ریمانڈ پر جیل بھیج دیا۔

واضح رہے کہ گزشتہ روز کارساز روڈ پر تیز رفتار گاڑی بے قابو ہو کر راہ گیروں پر چڑھ دوڑی تھی جس کے نتیجے میں ایک خاندان کے دو افراد جاں بحق اور متعدد زخمی ہو گئے تھے۔ پولیس نے موقع پر پہنچ کر گاڑی چلانے والی خاتون نتاشا کو گرفتار کر لیا تھا۔

پولیس نے عدالت میں پیشی کے دوران بتایا کہ ملزمہ نے اپنی گاڑی کو بے احتیاطی سے چلا کر ایک خاندان کو تباہ کر دیا ہے اور اس لیے اس کے خلاف مقدمہ درج کیا گیا ہے۔