برطانیہ میں این ایچ ایس بحران، ویٹنگ لسٹس بلندترین سطح پر پہنچ گئیں

لندن : برطانیہ میں صحت کی سہولیات فراہم کرنے والا ادارہ، نیشنل ہیلتھ سروس (این ایچ ایس) شدید بحران کا شکار ہے۔ تازہ ترین اعداد و شمار کے مطابق، تقریباً 76 لاکھ افراد مختلف بیماریوں کے علاج کے لیے قطار میں ہیں۔ یہ تعداد تاریخ میں سب سے زیادہ ہے۔

ماہرین کا کہنا ہے کہ کووڈ-19 وباء کے بعد سے این ایچ ایس پر بہت زیادہ دباؤ بڑھا ہے۔ لاک ڈاؤن کے دوران غیر ضروری سرجریاں روک دی گئیں تھیں جس کی وجہ سے ویٹنگ لسٹ میں اضافہ ہوا۔ اس کے علاوہ وباء کے دوران بہت سے لوگوں نے اپنی صحت کی جانچ پڑتال نہیں کروائی جس کی وجہ سے بھی بیماریاں پیچیدہ ہو گئیں۔

دل اور دوران خون کی بیماریاں برطانیہ میں اموات کی ایک بڑی وجہ ہیں۔ ہر سال تقریباً ایک لاکھ 60 ہزار سے زائد افراد ان بیماریوں کی وجہ سے اپنی جان سے ہاتھ دھو بیٹھتے ہیں۔

ہیلتھ فاؤنڈیشن کی ایک حالیہ رپورٹ کے مطابق برطانیہ ہائی انکم ممالک میں صحت کی سہولیات کی فراہمی کے معاملے میں سب سے پیچھے رہ گیا ہے۔ ایک دہائی پہلے تک برطانیہ ان ممالک میں شامل تھا جہاں لوگ آسانی سے ماہرین سے اپنی صحت کا معائنہ کروا سکتے تھے، لیکن اب صورتحال بالکل مختلف ہے۔

کیئر کوالٹی کمیشن کی ایک سروے کے مطابق، لوگوں کو ہسپتالوں میں روٹین چیک اپ کے لیے بھی بہت زیادہ انتظار کرنا پڑ رہا ہے۔ تاہم بیشتر لوگوں نے ڈاکٹروں اور ہسپتال کے عملے کے رویے سے متعلق اطمینان کا اظہار کیا ہے۔

ماہرین کا کہنا ہے کہ اگر اس صورتحال میں بہتری نہیں آئی تو برطانیہ کا صحت کا نظام مکمل طور پر تباہ ہو سکتا ہے۔ حکومت کو فوری طور پر اقدامات کرنے کی ضرورت ہے تاکہ این ایچ ایس کو بحال کیا جا سکے۔