فلسطینیوں پر دوبارہ گولیوں کی بارش، متعدد نمازی زخمی

عرب اوراسرائیل کے ذرائع ابلاغ کے مطابق اسرائیلی میں برسر اقتدار آنے والی نئی حکومت کے احکامات پر ایک مرتبہ پھر فلسطینیوں پر ظلم و ستم کے پہاڑ توڑ دیے گئے ہیں۔ اسرائیلی  فورسز نے ایک مرتبہ پھرمسجدالاقصیٰ پر دھاوا بولا اور نماز جمعہ کی ادائیگی کے لیے آنے والے نہتے فلسطینیوں پر ربر کی گولیاں برسائیں جس سے متعدد نمازی زخمی ہوئے ہیں۔

اسرائیل میں منصب اقتدار سنبھالنے والے نئے وزیراعظم نفتالی بینیٹ کے حلف اٹھاتے ہی اسرائیلی فورسز نے غزہ پہ بمباری کا سلسلہ شروع کردیا تھا۔

اسرائیلی فورسز نے سیزفائر معاہدے کی صریحاً خلاف ورزی کرتے ہوئے اسرائیلی طیاروں نے رات گئے غزہ اور خان یونس پربم برسائے تھے جس سے متعدد عمارتیں ملبےکا ڈھیر بن گئیں۔

حماس کے ترجمان نے اسرائیلی حملوں کی تصدیق کرتے ہوئے کہا تھا کہ فلسطینی یروشلم میں مقدس مقامات کے دفاع کے لیے مزاحمت جاری رکھیں گے۔

حماس اور اسرائیلی فوج کے درمیان ہونے والی 11 روزہ لڑائی کے بعد گزشتہ ماہ ہی بڑی طاقتوں کی مداخلت پر جنگ بندی کا معاہدہ طے پایا تھا۔