ابراہیم رئیسی نے ایرانی صدارتی انتخاب جیت لیا ، غیر سرکاری ذرائع

خبر ایجنسی کے مطابق ابراہیم رئیسی کو انتخابات میں 17.8ملین ووٹ پڑے ہیں ۔ انتخابات میں 28ملین سے زائد شہریوں نے ووٹ کاسٹ کیا۔

ایران کے سبکدوش ہونے والے صدر حسن روحانی نے کہا ہے کہ گزشتہ روز کے الیکشن میں انکے بعد آنےو الے صدر کو عوام نے منتخب کرلیا ہے ۔

حسن روحانی نے کہا کہ " میں عوام کو ان کے انتخاب پر مبارک باد پیش کرتا ہوں ، سرکاری طور پرمبارک بعد میں جاری کی جائیگی ، لیکن ہم جانتے ہیں کہ کس نے الیکشن میں درکار ووٹ حاصل کیے اور عوام نے کس کو آج منتخب کیا ہے" ۔

صداراتی الیکشن کےدیگر امیدواروں محسن رضائی اور امیر حسین غازی زادہ ہاشمی نے بھی ابراہیم رئیسی کو مبارک باد دی ہے ۔

غازی زادہ ہاشمی نے کہا کہ " قوم کے منتخب کرنے پر میں ریئسی کو مبارکباد پیش کرتا ہوں"۔ جبکہ محسن رضائی نے ٹویٹ کیا کہ وہ امید کرتے ہیں کہ رئیسی ملکی مسائل کے حل کے لیے مضبوط حکومت تشکیل دیں گے ۔

صدارتی الیکشن میں حصہ لینے والے واحد اصلاح پسند رہنما اور مرکزی بینک کے سابق گورنر عبدالناصر حماتی نے بھی ابراہیم رئیسی کو کامیابی پر مبارکباد دینے کے لیے ٹویٹ کیا ۔

واضح رہے کہ ابراہیم رئیسی نے 1979 کے انقلاب ایران کے فوراََ بعد ہی اہم عہدوں پر کام کیا ہے ۔ صرف 20 سال کی عمر میں وہ ضلع کراج اور پھر ہمدان صوبے کے لیے پراسیکیوٹر مقرر ہوئے  اس کے بعد انہیں تہران کے نائب پراسیکیوٹر کی حیثیت سے ترقی دی گئی ۔

وہ1989 میں تہران کے چیف پراسیکیوٹر بنے اور پھر 2004 میں نائب عدلیہ کے سربراہ کے عہدے پر دس سال تک فائز رہے ۔

2019  میں ابراہیم رئیسی عدلیہ کے سربراہ کی حیثیت سے خدمات انجام دے رہے تھے ۔