بابراعظم نے پی ایس ایل میں نئی تاریخ رقم کردی

تفصیلات کے مطابق  سٹار بلے باز نے پاکستان سپر لیگ6 ( پی ایس ایل ) میں اپنے 500 رنز مکمل کرتے ہوئے ٹورنامنٹ کیرئیر میں بھی دو ہزار رنز مکمل کرلیے ہیں ۔ وہ یہ منفرد کارنامہ سرانجام دینے والے پہلے کھلاڑی بن گئے ہیں ۔

ابوظہبی میں کوئٹہ گلیڈی ایٹرز کے خلاف کراچی کنگز کے میچ میں بابراعظم 23 رنز بنا کر آؤٹ ہوئے جس کے ساتھ پی ایس ایل 6 میں بابراعظم کے رنز کی تعداد 501 ہوگئی ۔

وہ پاکستان سپرلیگ ( پی ایس ایل ) کے کسی بھی ایک ایڈیشن میں پانچ سو رنز بنانے والے پہلے کھلاڑی ہیں ۔

اس سے قبل بھی پی ایس ایل کے کسی ایک ایڈیشن میں سب سے زیادہ رنز بنانے والے کھلاڑی بابراعظم ہی تھے ۔ انہوں نے گزشتہ سیزن میں 473 رنز بنا کر یہ حاصل کیا تھا ۔ حالیہ سیزن میں بابراعظم کا اوسط 71.57  ہے ۔

اس اننگز کے دوران بابراعظم نے اپنے پی ایس ایل کیرئیر میں 2000رنز بھی مکمل کیے ۔ بابراعظم کے پی ایس ایل کیرئیر میں مجموعی رنز 2017 ہوگئے ہیں۔

پی ایس ایل میں سب سے زیادہ رنز بنانے والوں کی فہرست میں بابراعظم کے بعد دوسرے نمبر پر کامران اکمل ہیں ، انہوں نے ٹورنامنٹ میں 1763 رنز بنائے ہیں ۔