آئی ایم ایف کے ایگزیکٹو بورڈ کے اجلاسوںکا شیڈول جاری، پاکستان کا نام شامل نہیں

اسلام آباد :آئی ایم ایف کے ایگزیکٹو بورڈ نے 18 ستمبر تک کے لیے جاری کیے گئے اپنے اجلاسوں کے شیڈول میں پاکستان کا معاملہ شامل نہیں کیا۔ ذرائع کا کہنا ہے کہ پاکستان کو 7 ارب ڈالر کے قرض پروگرام کی منظوری کے لیے ابھی بھی کئی رکاوٹیں عبور کرنا ہوں گی اور بیرونی فنانسنگ کا بحران گہرا ہوتا جا رہا ہے۔

پاکستان نے آئی ایم ایف کے ساتھ اسٹاف لیول معاہدہ 12 جولائی کو کیا تھا لیکن اب تک بیرونی فنانسنگ کا گیپ پورا نہیں کر پایا ۔ اس کے نتیجے میں آئی ایم ایف نے پاکستان کا معاملہ مؤخر کر دیا ہے۔

ذرائع کے مطابق پاکستان کو 3 سے 5 ارب ڈالر کے بیرونی فنانسنگ گیپ کا سامنا ہے۔ اس گیپ کو پورا کرنے کے لیے پاکستان نے مختلف ممالک اور اداروں سے قرض کی درخواستیں کی ہیں۔ ان میں اسلامک ڈویلپمنٹ بینک، اسلامک ٹریڈ فنانس کارپوریشن، اسٹینڈرڈ چارٹرڈ اور سعودی عرب شامل ہیں۔ پاکستان نے سعودی عرب سے مؤخر ادائیگیوں پر تیل کی سہولت کی درخواست بھی کی ہے۔

آئی ایم اف نے پاکستان کو بتایا ہے کہ پیشگی شرائط پوری ہونے کے بعد ہی پاکستان کا ایجنڈا شامل کیا جائے گا۔ پاکستان کو اب ان شرائط کو پورا کرنے کے لیے مزید کوششیں کرنی ہوں گی۔