طلبا کیلئے خوشخبری ، امتحانات میں فیل نہیں کیا جائے گا

وزیر تعلیم سندھ سعید غنی کی جانب سے طلباء کے لیے بڑا اعلان کیا گیا جس کے مطابق نویں ،دسویں ، گیارہویں اور بارہویں جماعت کے طلبا  کو امتحانات میں  فیل نہیں کیا جائے گا ۔جس کے نمبر 33 فیصد سے کم ہوئے اس کو اضافی نمبر دے کر پاس کر دیا جائے گا ۔

وزیر تعلیم نے مزید بتایا کہ امتحانات کا فارمیٹ تبدیل اور نصاب بھی کم کر دیا گیا ہے ۔

دوسری جانب سند ھ کےتعلیمی اداروں میں موسم گرما کی چھٹیوں سے متعلق اسٹیرنگ کمیٹی کا اجلاس ہوا جس میں سندھ کے تعلیمی اداروں میں موسم گرما کی تعطیلات نہ دینے کا فیصلہ کیا گیا ہے جبکہ گرمی بڑھنےکی صورت میں موسم گرما کی چھٹیاں دی جاسکتی ہیں۔

صوبے بھر میں دسویں جماعت کے امتحان 5 جولائی اور بارہویں کے امتحان 26 جولائی سے شروع ہونے کا نوٹیفیکشن جاری کردیا گیا ہے۔

محکمہ تعلیم سندھ کے نوٹیفکیشن کے مطابق نویں کے امتحانات دسویں کے اور گیارہویں جماعت کے امتحان بارہویں کے بعد ہوں گے۔

خیال رہے کہ گزشتہ ہفتے کورونا وائرس کے باعث عائد پابندیوں میں نرمی کے بعد اسکول کھول دیئے گئے تھے۔

سندھ کے اضلاع کراچی، حیدرآباد، سکھر سمیت سندھ بھر میں  چھٹی جماعت سے آٹھویں تک کلاسز 50 فیصد حاضری کے ساتھ شروع کی گئی ہیں اور جب کہ 21 جون سے تمام اسکول کھولنے کا فیصلہ کر لیا گیا ہے۔