واٹس ایپ دلچسپ فیچر متعارف کرانے کے لئے تیار

لاہور : واٹس ایپ اپنے صارفین کے لیے دلچسپ فیچر متعارف کرانے کے لئے تیار ہے۔اب آپ واٹس ایپ اسٹیٹس میں کسی بھی دوست کو ٹیگ کر سکیں گے۔ اس نئے فیچر کا نام اسٹیٹس اپ ڈیٹ مینشنز ہے۔

واٹس ایپ نے مارچ 2024 سے اس فیچر پر کام شروع کیا تھا اور اب اسے اینڈرائیڈ ڈیوائسز کے لیے بیٹا ورژن میں شامل کر لیا گیا ہے۔ اس فیچر کے تحت، جب آپ کوئی تصویر یا ویڈیو شیئر کریں گے تو کیپشن بار میں ایک@ کا نشان نظر آئے گا۔ اس نشان پر کلک کر کے آپ کسی بھی کنکشن کو ٹیگ کر سکیں گے۔ جس شخص کو آپ ٹیگ کریں گے، اسے ایک نوٹیفکیشن موصول ہوگا جس میں بتایا جائے گا کہ آپ نے اسے اپنے اسٹیٹس میں ٹیگ کیا ہے۔

اس نئے فیچر کی سب سے اہم بات یہ ہے کہ جس شخص کو آپ ٹیگ کریں گے، وہ اس اسٹیٹس کو اپنے دوستوں کے ساتھ بھی شیئر کر سکتا ہے۔ تاہم جب کوئی شخص اس اسٹیٹس کو ری شیئر کرے گا تو آپ کی شناخت ظاہر نہیں ہوگی۔ اسی طرح آپ کا مینشن کردہ کانٹیکٹ بھی اسٹیٹس کو دیکھنے والوں کو نظر نہیں آئے گا۔

رپورٹ کے مطابق آپ کے اسٹیٹس میں جس کانٹیکٹ کو مینشن کیا جائے گا، وہ اس اسٹیٹس کو اس وقت بھی دیکھ سکے گا جب آپ اسے پرائیویسی سیٹنگز کے ذریعے دیگر افراد تک پہنچنے سے روکیں گے۔

یہ ابھی واضح نہیں کہ واٹس ایپ کی جانب سے اس فیچر کو کب تک تمام صارفین کے لیے متعارف کرایا جائے گا۔