پنجاب میں فراہم کردہ مفت وائی فائی پوائنٹس میں اضافہ

لاہور: پنجاب حکومت نے صوبے میں مفت وائی فائی سروس کا دائرہ کار بڑھا دیا ہے۔ سیف سٹی لاہور کے ترجمان کے مطابق لاہور، قصور، ننکانہ صاحب اور شیخوپورہ سمیت مختلف شہروں میں 230 سے زائد مقامات پر مفت وائی فائی سروس دستیاب ہے۔

ترجمان نے بتایا کہ لاہور میں 200، قصور میں 10، شیخوپورہ میں 15 اور ننکانہ صاحب میں 5 پوائنٹس پر مفت وائی فائی سروس کا آغاز کیا گیا ہے۔ گزشتہ تین ماہ میں 7.7 ملین صارفین نے اس سروس کا استعمال کیا اور اوسط دستیابی 98.7 فیصد رہی۔شہری مفت وائی فائی سروس سے استفادہ کر کے اپنی روزمرہ کی زندگی کو آسان بنا رہے ہیں۔

انہوں نے کہا کہ مفت وائی فائی سروس سے شہریوں کو تعلیم، کاروبار اور سماجی رابطوں میں سہولت ہو رہی ہے۔ پنجاب حکومت کا مقصد صوبے کو ڈیجیٹل صوبہ بنانا ہے اور مفت وائی فائی سروس اس سمت میں ایک اہم قدم ہے۔