پاکستان اور چین کا دہشتگردی کیخلاف تعاون بڑھانے پر اتفاق 

اسلام آباد : پاکستان اور چین نے ہفتے کے روز انسدادِ دہشت گردی اور بارڈر مینجمنٹ سمیت مختلف شعبوں میں تعاون بڑھانے پر اتفاق کیا ہے۔ دونوں ممالک نے منشیات، اسلحہ اور دیگر غیر قانونی سامان کی اسمگلنگ کو روکنے کے لیے مشترکہ طور پر کام کرنے کا عزم بھی ظاہر کیا ہے۔

وزیر داخلہ محسن نقوی اور سیاسی اور قانونی امور کے وزیر چن مینگوو کی قیادت میں اعلیٰ سطح کے چینی وفد کے درمیان ملاقات ہوئی۔ وزیر داخلہ محسن نقوی اور چینی وفد کے سربراہ کے درمیان ہونے والی ملاقات میں دونوں ممالک کے درمیان تعلقات خاص طور پر سنکیانگ صوبے کے ساتھ تعاون بڑھانے پر زور دیا گیا۔

دونوں ممالک نے گلگت بلتستان اور سنکیانگ میں مشترکہ پولیس اور نیم فوجی دستوں کی مشقیں کرنے اور سنکیانگ پولیس اکیڈمی میں پاکستانی پولیس افسران کو تربیت دینے پر بھی اتفاق کیا ہے۔

وزیر داخلہ محسن نقوی نے کہا کہ چین کے ساتھ تعلقات میں سنکیانگ صوبہ پاکستان کے لیے انتہائی اہمیت کا حامل ہے اور سی پیک منصوبہ بھی سنکیانگ سے گزرتا ہے۔ انہوں نے کہا کہ پاکستان منشیات، اسلحہ اور دیگر غیر قانونی سامان کی اسمگلنگ کو مکمل طور پر ختم کرنا چاہتا ہے۔

چینی وفد کے سربراہ نے پاکستان کے ساتھ تمام شعبوں میں تعلقات بڑھانے کی خواہش کا اظہار کرتے ہوئے کہا کہ دہشت گردی ایک مشترکہ مسئلہ ہے اور سنکیانگ کئی سالوں سے اس کا شکار ہے۔ انہوں نے کہا کہ پاکستان انسدادِ دہشت گردی میں سنکیانگ کے تجربے سے فائدہ اٹھا سکتا ہے۔