جعلی مقدمات پی ٹی آئی کارکنوں اور رہنماؤں کے حوصلے پست نہیں کرسکتے، بیرسٹر سیف

لاہور میں پاکستان تحریک انصاف (پی ٹی آئی) کے رہنماؤں اور کارکنان پر مقدمات بنائے جانے پر مشیراطلاعات خیبرپختونخوا بیرسٹر سیف کا ردعمل دیتے ہوئے کہا کہ جعلی مقدمات پی ٹی آئی کارکنوں اور رہنماؤں کے حوصلے پست نہیں کرسکتے۔

سوشل میڈیا پلیٹ فارم ایکس پر اپنے ٹویٹ میں بیرسٹر سیف کا کہنا تھا کہ جعلی حکومت کی طرف سے پی ٹی آئی کے خلاف جعلی مقدمات بنائے جا رہے ہیں، ۔وزیر اعلی علی امین گنڈاپور کے خلاف سیاسی مقدمے درج کئے گئے ہیں، مقدمات کا مقصد پنجاب میں ہونے والے جلسوں میں علی امین گنڈاپور کی شرکت کو روکنا ہے۔

مشیر اطلاعات کا کہنا ہے کہ علی امین گنڈاپور سیاسی مقدمات کی پرواہ کئے بغیر جلسوں میں بھرپور شرکت کرینگے، راج کماری مریم نواز پنجاب پولیس کا قبلہ درست کریں، مریم نواز کچے کے ڈاکوؤں پر توجہ دیں پولیس کی ضرورت وہاں پر ہے۔

انہوں نے مزید کہا کہ جعلی حکومت سیاسی مقاصد کے حصول کے لئے آئین وقانون سے کھیل رہے ہیں، بانی پی ٹی آئی عمران خان کی رہائی کے لئے جدوجہد جاری رکھیے گے، جعلی حکومت کے دن گنے جاچکے ہیں۔

خیال رہے کہ گزشتہ روز لاہور میں پی ٹی آئی کے جلسے میں شریک تحریک انصاف کے رہنماؤں حماد اظہر، شیخ امتیاز اور عالیہ حمزہ کے خلاف مقدمہ درج کرلیا گیا، مقدمے میں پی ٹی آئی کے 30 سے 40 نامعلوم کارکن بھی ملزم نامزد ہیں۔