عمران خان سے وکلاء کی ملاقات نہ کرانے پر سیکرٹری داخلہ اور سپرنٹنڈنٹ اڈیالہ جیل کو نوٹس

اسلام آباد ہائی کورٹ نے سابق وزیراعظم عمران خان سے اڈیالہ جیل میں وکلاء کی ملاقات نہ کرانے پر سیکرٹری داخلہ اور سپرنٹنڈنٹ اڈیالہ جیل کو نوٹس کر دیا۔

اسلام آباد ہائیکورٹ کے جسٹس سمن رفعت امتیاز نے عمران خان کی توہین عدالت کی درخواست پر سماعت کی اور نوٹس جاری کرتے ہوئے وکیل کو دیگر پہلوؤں پر بھی غور کرنے کی ہدایت کی۔ 

جسٹس سمن نے ریمارکس دیئے کہ اس کیس میں عدالتی حکم کی کوئی خلاف ورزی نہیں ہوئی۔ ہائی کورٹ کے دو رکنی بینچ نے ایس او پیز بنانے کی ہدایت کی تھی اگر خلاف ورزی ہوئی ہے تو اس بنچ میں توہین عدالت کی درخواست کی جائے۔

دوران سماعت جسٹس ثمن رفعت امتیاز نے ریمارکس دیتے ہوئے کہا ہے کہ میرے خیال میں توہین عدالت کی درخواست اس کیس میں نہیں بنتی، میں نوٹس جاری کر دیتی ہوں لیکن میں مطمئن نہیں ہوں۔

بعدازاں اسلام آباد ہائیکورٹ کی جسٹس ثمن رفعت امتیاز نے عمران خان کی توہین عدالت کی درخواست پر سیکرٹری داخلہ اور سپرنٹنڈنٹ اڈیالہ جیل کو نوٹس جاری کرتے ہوئے کیس کی سماعت ملتوی کر دی۔

واضح رہے کہ انتظار پنجوتھہ ایڈووکیٹ نے توہین عدالت کی درخواست میں سیکرٹری داخلہ اور سپرنٹنڈنٹ اڈیالہ جیل کو فریق بنا رکھا ہے۔