معروف موسیقار طافو خان کا انتقال طویل علالت کے باعث ہوا، الطاف حسین طافو کی عمر 79 برس تھی اوروہ گزشتہ کئی ماہ سے گردوں کے مرض میں مبتلا تھے۔
 طافو خان نے متعدد فلموں کی موسیقی دی اور کئی نامور گلوکاروں کو متعارف کرایا۔استاد طافو نے اپنی موسیقی کے ذریعے لگ بھگ 60 سال پاکستان کی فلم انڈسڑی پر راج کیا، انہوں نے  گلوکار مہدی حسن، نور جہاں، غلام علی، استاد نصرت فتح علی، نصیبوں لعل، شازیہ منظور سمیت بہت سے موسیقاروں کے ساتھ کام کیا۔ 
 موسیقی کے میدان میں خدمات کے اعتراف میں 2023 میں استاد طافو  صدارتی تمغہ حسن کارکردگی سے نوازا گیا۔ 
 وزیراعلیٰ پنجاب مریم نواز نے استاد طافو خان کے انتقال پر اظہارتعزیت کیا

وفاقی پولیس نے سنگجانی کے علاقے میں پولیس کی قیدی بسوں پر حملے کا مقدمہ درج کرلیا۔

پولیس کے انسپکٹر لیاقت علی کی مدعیت میں 82 قیدیوں اور متعدد حملہ آوروں کے خلاف تھانہ سنگجانی میں مقدمہ درج کیا گیا جس میں انسداد دہشتگردی ایکٹ کی دفعہ 7ATA سمیت سنگین نوعیت کی 11دفعات شامل کی گئی ہیں۔

82 افراد کو عدالت میں پیشی کے بعد اٹک جیل منتقل کیا جا رہا تھا، ٹول پلازہ کے قریب 35 سے 40 مسلح افراد نے فائرنگ کی اور لاٹھیوں سے حملہ کیا، ملزمان کو لیجانے والی وین پر چند افراد نے فائرنگ کی، حملہ آوروں کی جانب سے زیر حراست ملزمان کو قیدی وین سے آزاد کروایا، جبکہ پولیس پربھی حملہ کیا جس سےاہلکار زخمی ہوئے۔  

واضح رہے کہ مقدمے کے متن کے مطابق عدالت میں زیر حراست ملزمان کی پیشی کے موقع پر حملے کی منصوبہ بندی کی گئی، چار مشکوک گاڑیاں بھی دیکھی گئیں۔

ملزمان نے فائرنگ کر کے ٹائر برسٹ کیا، لوہے کے راڈ سے وینز کا تالا توڑا گیا، پولیس موقع پر پہنچی تو سرکاری گاڑیوں کے شیشے توڑے جارہے تھے، گاڑی سے اترنے کے بعد قیدی بھی حملہ آوروں کے ساتھ مل گئے اور پولیس پر حملہ کیا، فرار ہونے والے متعدد قیدیوں اور 4 حملہ آوروں کو گرفتار کر لیا گیا۔

بعدازاں پولیس نے گرفتار 82 ملزمان کو انسداد دہشت گردی عدالت میں پیش کیا اور جسمانی ریمانڈ کی درخواست کی۔ وکیل نے کہا کہ پولیس ملزمان کو چھوڑنا نہیں چاہتی اس لیئے جھوٹا وقوعہ بنایا گیا۔

قاضی فائز عیسیٰ قدیم ترین یونیورسٹی مڈل ٹیمپل ان کے بنچ ماسٹر منتخب ہو گئے ہیں۔

ذرائع کے مطابق سابق چیف جسٹس قاضی فائزعیسیٰ نے منفرد اعزاز اپنے نام کر لیا ہے، قاضی فائزعیسیٰ پہلے پاکستانی ہیں جو قدیم ترین یونیورسٹی مڈل ٹیمپل ان کے بنچ ماسٹر منتخب ہوئے ہیں۔

کنگ کونسل، عدلیہ کے سینئر ممبران نے قاضی فائز عیسیٰ کو منتخب کیا ہے، مڈل ٹیمپل میں اس وقت 510 معمولی اور107 سینئر بنچرز ہیں۔

تمام شعبہ ہائے زندگی سے تعلق رکھنے والے اعلیٰ افراد کو بنچر بنایا جاتا ہے، مڈل ٹیمپل میں 172 اعزازی بنچرز شامل ہیں، اس میں  پرنس آف ویلز کا شاہی بنچ بھی شامل ہے۔

اعزازی بنچ کا انتخاب مڈل ٹیمپل کے اعلیٰ حکام کی صوابدید پر ہوتا ہے، پہلی دفعہ کسی پاکستان جج کو بطور بنچ ماسٹرمنتخب کیا گیا ہے، یہ درسگاہ 14ویں صدی میں قائم ہوئی تھی۔