امریکی اراکین کانگریس کا بانی چیئرمین سے متعلق خط صدر جوبائیڈن کو موصول

بانی چیئرمین پی ٹی آئی عمران خان سے متعلق امریکی اراکین کانگریس کا خط امریکی صدرجو بائیڈن کو موصول ہوگیا۔

واشنگٹن میں پریس بریفنگ کے دوران امریکی محکمہ خارجہ کے ترجمان میتھیو ملر نے تصدیق کرتے ہوئے کہا کہ ارکان کانگریس کا پاکستان سے متعلق لکھا گیا خط صدر جو بائیڈن کو موصول ہوگیا ہم ممبران کو خط کا مناسب وقت پر جواب دیں گے۔

میتھو ملر نے کہا کہ ہم پاکستان میں جمہوریت کو پھلتا پھولتا دیکھنا چاہتے ہیں، جمہوری عمل میں شرکت ہر کسی کا بنیادی حق ہے، اس میں جمہوریت میں حصہ لینے اور ان کی بنیادی آزادیوں کو بروئے کار لانے کا حق شامل ہے۔

واضح رہے کہ چند روز قبل امریکی ایوان نمائندگان کے 60 سے زائد اراکین نے بانی پی ٹی آئی کی رہائی کا مطالبہ کرنے کے لیے امریکی صدر جو بائیڈن کو خط لکھا تھا۔

اراکین پارلیمان نے اپنے خط میں جو بائیڈن سے سابق وزیراعظم سمیت پاکستانی جیلوں سے سیاسی قیدیوں کی رہائی کی کوششوں کے ساتھ پاکستان کے بارے میں امریکی پالیسیوں میں انسانی حقوق کو مرکز بنانے کا مطالبہ کیا تھا۔ خط میں امریکی سفارتخانے کے اہلکاروں سے جیل میں بانی پی ٹی آئی عمران خان سے ملنے کی بھی اپیل کی گئی تھی۔