پشاور ہائی کورٹ میں بشریٰ بی بی کی حفاظتی ضمانت منظور، گرفتار نہ کرنے کا حکم

پشاور ہائیکورٹ نے مقدمات کی تفصیل سے متعلق کیس میں بانی چیئرمین عمران خان کی اہلیہ بشریٰ بی بی کی حفاظتی ضمانت منظور کرتے ہوئے آئندہ 14 روز تک کسی مقدمے میں گرفتار نہ کرنے کا حکم دے دیا۔

پشاور پائیکورٹ کے جسٹس شکیل احمد اور جسٹس صاحبزادہ اسد اللہ نے مقدمات کی تفصیل سے متعلق کیس میں بشریٰ بی بی کی درخواست پر سماعت کی، سینئر قانون دان قاضی انور ایڈووکیٹ عدالت میں پیش ہوئے جبکہ ایڈووکیٹ جنرل اور بشریٰ بی بی بھی عدالت میں موجود رہے۔

وکیل بشریٰ بی بی نے عدالت کو بتایا کہ چاروں صوبوں میں بشری بی بی کے خلاف مقدمات درج ہیں، مقدمات معلوم نہیں، تفصیل فراہم کرکے گرفتار نہ کیا جائے۔

جسٹس شکیل احمد نے ریمارکس دیے کہ میرا خیال ہے خیبرپختونخوا میں کوئی مقدمہ نہیں ہوگا، جس پر وکیل بشری بی بی کا کہنا تھا کہ جی خیبرپختونخوا میں نہیں، اس لیے یہاں آئی ہیں۔

جسٹس صاحبزادہ اسد اللہ نے ریمارکس دیئے کہ اگر یہاں کوئی کیس نہیں تو کیا ہم حفاظتی ضمانت دے سکتے ہیں، جس پر وکیل بشری بی بی نے مؤقف اپنایا کہ قانون اور آئین ہر شہری کو تحفظ کا یقین دلاتا ہے، پشاور ہائیکورٹ نے پہلے بھی حفاظتی ضمانتیں دی۔

بعدازاں عدالت نے بشریٰ بی بی کی حفاظتی ضمانت منظور کرتے ہوئے نیب، ایف آئی اے سمیت تمام اداروں سے مقدمات کی تفصیل طلب کرلی۔

پشاور ہائیکورٹ نے عدالت نے 14 روز تک کسی بھی مقدمے میں اہلیہ بانی پی ٹی آئی کو گرفتار نہ کرنے کا حکم دے دیا۔

واضح رہے کہ 23 اکتوبر کو اسلام آباد ہائی کورٹ نے توشہ خانہ ٹو کیس میں سابق وزیراعظم اور پاکستان تحریک انصاف (پی ٹی آئی) کے بانی عمران خان کی اہلیہ بشریٰ بی بی کی ضمانت 10،10 لاکھ روپے ضمانتی مچلکوں کی عوض منظور کرلی تھی۔