جعلی حکومت نے پنجاب سمیت پورے ملک کو تباہی کے دہانے پر پہنچا دیا، بیرسٹر سیف

پاکستان تحریک انصاف کے رہنما و مشیر اطلاعات خیبر پختونخوا بیرسٹر سیف نے کہا ہے کہ مریم نواز کسان کارڈ کھیلنا بند کریں، کسانوں کو جواب دیں کہ ان کے خون پسینے سے اگائی گئی گندم کیوں نہیں خریدی گئی،جعلی حکومت نے پنجاب سمیت پورے ملک کو تباہی کے دہانے پر پہنچایا ہے۔

سوشل میڈیا پلیٹ فارم ایکس پر اپنے ٹویٹ میں بیرسٹر سیف نے کہا کہ جعلی راج کماری کی تمام تر توجہ پی ٹی آئی کارکنوں کی پکڑ دھکڑ پر ہے اور جھوٹ کا سہارا لے کر سیاست کرتی ہے، پنجاب میں سرکاری ہسپتالوں سمیت تمام ادارے دیوالیہ ہوچکے ہیں، شریف خاندان کے کاروبار دن دگنی رات چگنی ترقی کررہی ہے، دوسری جانب ملک معاشی بحرانوں نے گھیر لیا ہے۔

مشیر اطلاعات کا کہنا ہے کہ پنجاب کے کسانوں کو 300 ارب روپے ٹیکہ لگانے والوں کو اہم عہدوں پر کیوں بٹھایا ہے؟پنجاب کی سڑکوں پر کسانوں کا احتجاج روز کا معمول بن گیا ہے مگر شنوائی نہیں ہورہی ہے، آپکی غلط پالیسیوں کیوجہ سے کسانوں کے پاس اب بھی لاکھوں ٹن گندم ویسے ہی پڑے ہیں۔

انہوں نے کہا کہ مریم نواز کو خیبر پختونخواحکومت کا شکریہ ادا کرنا چاہئیے کہ پنجاب کے کسانوں سے گندم خریدی ہے، گزشتہ دنوں بھی پنجاب کے کسانوں نے پریس کانفرنس کرکے آپکی جعلی حکومت کی کارکردگی عیاں کیں،آپکی جعلی حکومت میں کسان خودکشیوں پر مجبور ہیں۔

پی ٹی آئی رہنما نے مزید کہا کہ ٹک ٹاک پر ترقی کے منازل طے کرنے والی لاہور کی قلعی کھل گئی،پچھلے ایک ہفتے سے لاہور دنیا کے آلودہ ترین شہروں میں ٹاپ پوزیشن پر ہے، اپنے گھر لاہور کی یہی صورتحال ہے باقی صوبے اور ملک کا اللہ ہی حافظ ہو، جعلی صوبائی اور وفاقی حکومت کی ترقی صرف اشتہارات کی حد تک محدود ہے۔

بیرسٹر سیف نے کہا کہ پتہ نہیں مریم نواز کی پریس کانفرنس علی امین اور خیبر پختونخوا پر تنقید کرنے کے بغیر کیوں پوری نہیں ہوتی ہے۔