اسلام آباد ہائیکورٹ کے چیف جسٹس بلاک پر وکلاء کی جانب سے توڑ پھوڑ کرنے پر مقدمہ درج

تفصیلات کے مطابق  اسلام آباد ہائیکورٹ کے چیف جسٹس بلاک پر وکلا کی جانب سے دھاوا بولنے کے معاملے پر  اسلام آباد ہائیکورٹ کے سیکورٹی انچارج کی مدعیت میں ملوث وکلا کے خلاف مقدمہ درج کرلیا گیا۔اسلام آباد ہائیکورٹ نے ترجمان کی جانب سے تفصیلات جاری کردیں گئیں ۔

ترجمان اسلام آباد ہائیکورٹ کا کہنا ہے کہ  چیف جسٹس بلاک پر حملہ کرنے اور توڑ پھوڑ کرنے والے 21 وکلا پر مقدمہ درج کرلیا گیا ہے،  کچھ وکلا نے اسلام آباد ہائیکورٹ کے چیف جسٹس بلاک پر حملہ کیا توڑ پھوڑ کی۔ پولیس نے ایف آئی آر  میں نامزد وکلاء کی تلاش میں چھاپے مارنے شروع کر دئیے ہیں۔

ترجمان ہائیکورٹ کے مطابق ایف آئی آر میں  تصدق حنیف ،شہلا شان عباسی،حماد،عمر خیام،احسن مجید گجر، خالد محمود،شائستہ تبسم،یاسر خان،ناہید،اشفین،راجہ فخر کا نام ایف آئی آر میں شامل ہے،  نصیر کیانی،ارباب ایوب گجر،اسد اللہ،راجہ زاہد،لیاقت منظور،نوید ملک، خالد تاج،شعیب چوہدری،معراج ترین، ظفر کھوکھر کا نام بھی ایف آئی آر میں درج کیا گیا ہے۔

ترجمان اسلام آباد ہائیکورٹ کا کہنا ہے کہ   مقدمہ میں شامل وکلاکے خلاف الگ سے توہین عدالت کی کارروائی شروع کی جا رہی ہے،ملوث وکلا کے خلاف لائسینس معطلی کے لیے اسلام آباد بار کونسل کو ریفرنس ارسال کیا جا رہا ہے۔

ایف آئی آر  میں کہا گیا ہے کہ  250 سے 300 کے قریب مشتعل وکلاء اسلام آباد ہائی کورٹ میں داخل ہوئے، وکلاء نے چیف جسٹس اطہر من اللہ کو محصور کرلیا،وکلاء نے صحافیوں، ملازمین پر تشدد کیا اور چیف جسٹس کے گارڈ سے اسلحہ بھی چھین لیا۔

  ایف آئی آر میں کہا گیا ہے کہ  وکلاء نے معزز عدالت میں توڑ پھوڑ کی اور اس تقدس پامال کیا،  دیگر ججز نے آکر چیف جسٹس اطہر من اللہ کو وکلاءمشتعل وکلاء سے آزاد کرایا،وکلاء نے کار سرکار میں مداخلت اور سرکاری املاک کو نقصان پہنچایا، اسلام آباد ہائیکورٹ پر حملہ کرنے والے وکلاء کے خلاف قانونی کارروائی کی جائے۔