ای سی او ممالک کےدرمیان اقتصادی تعاون سے خطے میں امن واستحکام آئے گا، اسحا ق ڈار

نائب وزیراعظم اسحا ق ڈار نے کہا ہے کہ وسیع تر روابط، ویزے کی پالیسی میں نرمی اور سرحدی طریقہ کار کو آسان بنانا ای سی او کے خطے کی جغرافیائی اور اقتصادی استعداد کار سے استفادہ کرنے کیلئے ناگزیر ہے۔

انہوں نے آج(منگل کو) ایران کے شہر مشہد میں ای سی او کانفرنس کے وزراء کے اجلاس میں اظہار خیال کرتے ہوئے کہا کہ اس حکمت عملی سے پائیدار ترقی کے لئے ایک دوسرے پر انحصار کرنے اور رکن ملکوں کو توانائی کے وسائل کے موثر استعمال کیلئے بہتر حکمت عملی وضع کرنے میں مدد ملے گی۔

اسحاق ڈار نے کہا کہ ای سی او ملکوں کے درمیان وسیع تر اقتصادی تعاون سے خطے میں امن و استحکام آئے گا۔

وزیراعظم نے کہا کہ خطے اور ای سی او کے ادارے بہتر حکمت عملی اور عوامی سطح پر رابطوں کے ذریعے ہدہرے اے مقاصد کو پورا کرنے میں اہم کردار ادا کر سکتے ہیں۔

انہوں نے کہا کہ پاکستان اپنے ریل اور سڑکوں کے بنیادی ڈھانچے کو ترقی دے رہا ہے تاکہ ہمسایہ ملکوں اور دیگر ممالک کے ساتھ اشیاء کی نقل و حمل کو مزید بہتر بنایا جا سکے۔

اسحاق ڈار نے اسرائیل کی جانب سے غزہ میں فلسطینیوں کی نسل کشی اور لبنان اور شام پر اس کی جارحیت کی مذمت کرتے ہوئے مشرق وسطیٰ میں بڑھتے ہوئے پرتشدد واقعات پر تشویش ظاہر کی جہاں اسرائیل نے علاقائی امن و سلامتی کو خطرے میں ڈال دیا ہے۔