وفاقی تحقیقاتی ادارے(ایف آئی اے) کے سائبر کرائم ونگ نے میڈیکل میں داخلے کے لیے ہونے والا انٹری ٹیسٹ(ایم ڈی کیٹ) کا پرچہ لیک اور سوشل میڈیا پر وائرل کرنے والے 15 افراد کے خلاف مقدمہ درج کر کے کارروائی کا آغاز کر دیا۔

میڈیکل اینڈ ڈینٹیل  کالج ایڈمیشن ٹیسٹ 2024 کے انٹری ٹیسٹ کا پرچہ لیک ہونے پر ہیومن رائٹس اینڈ ڈیفینڈر آرگنائزیشن کے ممبر بورڈ آف ڈائریکٹرز  کی جانب سے  ایف آئی اے سائبر کرائم ونگ میں درخواست دائر کی گئی تھی۔

انکوائری افسر انسپکٹر ارفع سعید نے پیکا ایکٹ 2016 کی سیکشن 3 ،4 ،13، 14 اور 20 سمیت دیگر دفعات کے تحت مقدمہ درج کیا۔ 

ایس ایچ او سائبر کرائم ونگ اشرف جان کے مطابق مقدمے میں کنٹرولر اور ڈپٹی کنٹرولر امتحانات سمیت 15 افراد کو نامزد کیا گیا ہے جب کہ 3 ملزمان طارق عزیز سومرو، بلال شیرازی اور ایک نامعلوم کو گرفتار بھی کیا گیا ہے۔

پاکستان کرکٹ ٹیم کے ٹیسٹ ہیڈ کوچ جیسن گلیسپی کا پی سی بی سے راہیں جدا کرنے کا امکان ہے۔

جیسن گلیسپی پاکستان اور جنوبی افریقہ کے  مابین ہونے والی ٹیسٹ سیریز میں قومی ٹیم کو جوائن نہیں کریں گے۔

ذرائع کے مطابق  قومی ٹیسٹ اسکواڈ کے کھلاڑی کل جنوبی افریقہ روانہ ہو رہے ہیں، اس دوران ہیڈ کوچجیسن گلیسپی نے بھی  ٹیم کو جوائن کرنا تھا، مگر وہ جوائن نہیں کر رہے۔

ذرائع کے مطابق ہیڈ کوچ اپنے نائب ٹم نیلسن کے معاہدے میں توسیع نہ ہونے کی وجہ سے پاکستان کرکٹ بورڈ سے ناراض ہیں۔

سوشل میڈیا پر بدنیتی  پر مبنی مہم چلانے پر آئی جی اسلام آباد پولیس علی ناصر رضوی کی سربراہی میں قائم ہونے والی جوائنٹ انٹروگیشن ٹیم نے  ملزمان کو نوٹسز جاری کر دیے۔

جے آٗئی ٹی کی جانب سے ملزم صبغت اللہ ، محمد ارشد، عطا الرحمان، اظہر مشوانی، کومل آفریدی، عروسہ ندیم اور ایم علی ملک کونوٹسز  جاری کیے گئے۔

 جے آئی ٹی نے ملزمان کو 13 دسمبر کو طلب کرلیا، ملزمان نے سوشل میڈیا پر بدنیتی پر مبنی مہم کے ذریعے پاکستان میں افراتفری اور انتشار پھیلایا۔

وفاقی حکومت نے  سوشل میڈیا پر جرائم کی روک تھام کے لئے  پیکا ایکٹ 2016 کے سیکشن 30 کے مطابق  آئی جی پولیس کے ماتحت ایک مشترکہ تحقیقاتی ٹیم تشکیل دی ہے۔

جے آئی ٹی کے پاس  ملزمان کے خلاف ملک میں بد امنی اور انتشار پھیلانے کے لئے سوشل میڈیا پر پروپیگنڈا کرنے کے ٹھوس شواہد  موجود ہیں اور مزید مجرموں کی شناخت اور ان کے خلاف قابل اطلاق قوانین کے تحت کارروائی عمل میں لائی جا رہی ہے۔